Жогорку Кеңештин депутаты Өмүрбек Текебаев президенттик шайлоого катышпай тургандыгын “Ала-Арча” мамлекеттик резиденциясында өтүп жаткан Жогорку Кеңештин жыйынында өзү билдирди.

Түркиянын Измир шаарындагы жер титирөөдөн каза болгондордун саны 110 адамга жетти. Бул тууралуу өлкөнүн президенти Тайип Эрдоган маалымат жыйын учурунда билдирди. Буга чейин 107 адам каза болгону айтылган.

Канат Исаев Жогорку Кеңештин төрагалыгынан кетип жатат. Бул тууралуу “Ала-Арча” мамлекеттик резиденциясында өтүп жаткан Жогорку Кеңештин жыйынында Исаев өзү билдирди.

Бүгүн Ысык-Көл облусунун Чолпон-Ата шаарында КРдин Президентинин кубогу үчүн болгон көк бөрү оюну старт алды. Анда, Ысык-Көлдүн "Мурас" жана "Жети-Өгүз", Чүйдүн "Сокулук", Нарындын "Жумгал" командалары жеңишке жетти. Бул тууралуу Topsport.kg спорттук сайтынын кабарчысы жеринен маалымдайт. 

Президенттин милдетин аткаруучу, премьер-министр Садыр Жапаров Ош облусуна жасаган иш сапарынын алкагында Ош шаарынын жана облустун активи менен болгон жолугушуу учурунда алдыдагы президенттик шайлоодо административдик ресурсту колдонууга жол бербей тургандыгын билдирди.

Кыргызстанда бир нече сааттын ичинде доллардын курсу 84 сомго жетти. Эртең менен доллар 83,3 сомдон сатылып жаткан. Белгилей кетсек доллардын курсу ушул жумадан тарта жогорулай баштаган.

Саламаттык сактоо министринин орун басары Нурболот Үсөнбаевдин айтымында, учурда экинчи чейректе балдардын мектепке барып-келип окуу маселеси каралууда. 

Дүйнөдө коронавирус жуктуруп алгандардын саны 46 млн 801 миң 621 адамды түздү. Бул тууралуу Жонс Хопкинс университетинин атайын жүргүзгөн эсебинде көрсөтүлгөн. Коронавирусту АКШда 9,2 млн, Индияда 8,2 млн, Бразилияда 5,5 млн, Россияда 1,6 млн, Францияда 1,4 млн, Испанияда 1,2 млн, Аргентинада 1,1 млн адам жуктуруп алды. Дүйнөдө коронавирустан 1 млн 205 миң 221 адам каза болду.

Кыргыз Республикасынын Президентинин милдетин аткаруучу, Премьер-министр Садыр Жапаров Ош облусуна жасаган иш сапарынын алкагында Ош шаарынын жана облустун активи менен жолугушту. Бул тууралуу өкмөттүн расмий сайтында маалымдалат.

Түркиянын батышындагы жер титирөөдөн каза болгондордун саны 83 адамга жетти. Буга чейин 79 адам каза болуп, 962 жаран жабыркагандыгы айтылган. Ооруканаларда 219 адам дарыланууда. Эскерте кетсек, Түркиянын батышында 30-октябрда күчү 6,6 баллга жеткен жер силкинүү болгон.

Мамлекеттик чек аранын сакталышы үчүн Баткен облусуна биз ар дайым өзгөчө көңүл бурууга милдеттүүбүз. Бул тууралуу Кыргыз Республикасынын Президентинин милдетин аткаруучу, Премьер-министр Садыр Жапаров Баткен районундагы Көк-Таш – Тамдык жана Ак-Сай – Рават автожолдорунун курулуш менен таанышкан учурда билдирди. Бул тууралуу өкмөттүн аппаратынын маалыматтык камсыздоо бөлүмү билдирет.

2-8-ноябрга чейин Чолпон-Ата шаарындагы ипподромдо өтө турган «Кыргыз Республикасынын Президентинин Кубогу-2020» — көк бөрү жана башка ат оюндары көрүүчүлөрсүз өтөт. Бул тууралуу Көк-бөрү федерациясы билдирет. 

Мамлекеттик бюджетке 1,1 млрд сом зыян келтирген кылмыштуу топтун ишине бөгөт коюлду. Бул тууралуу Экономикалык кылмыштарга каршы күрөшүү мамлекеттик кызматынан билдиришти.

Эл жана турак жай фондун каттоо 2021-жылга жылдырылды. Бул тууралуу Улуттук статистика комитетинен билдиришти. Эскертке кетсек, быйыл эл каттоону жаз айларында өткөрүү пландалып, бирок коронавируска байланыштуу эл каттоо жүргүзүүнү токтотуп турууга туура келген.

Англиялык окумуштуулар нан жана сүткө D витаминин кошууну өкмөттөн өтүндү. Бул коронавирус менен күрөшүүдө натыйжалуу болушун айтышууда. Улуу Британиянын калкынын жарымы D витамининин жетишсиздигинен жабыркайт. D витамини балык азыктарында, жумуртканын сарысы, сүт, козу карын, апельсин ширеси жана башка азыктарда көп. 

Улуу Британиянын премьер-министри Борис Жонсондун айтымында, карантин 2-декабрга чейин уланат. Эң эле биринчи коомдук тамактануучу жайлар, дүкөндөр жабылат. Бирок, мектептер менен ЖОЖдор иштей берет. Өлкөдө коронавирус жуктуруп алгандардын саны 1 011 660га жетти. 

Түркиянын Измир шаарында болгон жер титирөөдөн каза болгондордун саны 39га жетти. Бул тууралуу өлкөнүн Өзгөчө кырдаалдар агенттиги билдирет. Учурда куткаруучулар урап түшкөн 9 көп кабаттуу үйлөрдө иштеп жатышат. Буга чейин күчү 6,6 баллга жеткен зилзаладан 37 киши көз жумганы кабарланган. 

Күн мурун, 30-октябрда президенттин милдетин аткаруучу Садыр Жапаров кол койгон Жарлыкка ылайык, Анаркулов Нургазы Сеитказыевич президенттин аппаратынын маалыматтык саясат бөлүмүнүн башчысы болуп дайындалды.

Төрт адам мөөнөтүнөн мурда өтчү президенттик шайлоого катышуу үчүн арыз берди. Боршайкомдон билдиришкендей, 31-октябрда КР жараны Нышанов Назарбек Айтбекович президенттикке өзүнүн талапкерлигин көрсөткөн, 1961-жылы 20-мартта туулган, «Лига-Антикризис» коомдук бирикмесинин президенти.

Тажикстанда кайрадан шайланган президент Эмомали Рахмон ант берди: президенттин кызматка киришүү аземи жума күнү өкмөттүк «Кохи Сомон» резиденциясында өттү. Ушуну менен Рахмон бешинчи жолу президенттик такка отурду.

Кыргызcтандын президентинин милдетин аткаруучу Садыр Жапаров кол койгон Жарлыкка ылайык, Нургазы Анаркулов КРдин Президентинин Аппаратынын маалыматтык саясат бөлүмүнүн башчысы болуп дайындалды. Бул тууралуу президенттин аппаратынын маалыматтык саясат бөлүмү билдирет. Маалыматка ылайык, президенттин милдетин аткаруучу Садыр Жапаров кол койгон дагы бир Жарлыкка ылайык, Наргиза Мансурова берген арызынын негизинде президенттин аппаратынын маалыматтык саясат бөлүмүнүн башчысы кызматынан бошотулду.

2020-жылдын 6 айынын жыйынтыгы боюнча инвестициялык каражаттардын агымы 56%га кыскарды. Бул тууралуу Бишкектеги маалымат жыйынында биринчи вице-премьер-министр Артем Новиков билдирди. Анын айтымында, 2020-жылы пандемия дүйнөдөгү ар бир өлкөгө өз таасирин тийгизди.

IMAX кинотеатрлар тармагы Toho жапон компаниясы менен беш эксклюзивдүү тасма жаратуу боюнча келишим түздү. Муну менен IMAX жапон кино рыногуна басым жасоодо. АКШ менен Канада пандемияда тарткан зыянын эсептеп бүтө электе, Жапонияда Toho компаниясы тарткан "Шайтанды жара чапкан кылыч: Чексиз поезд" мультфильми IMAXтын 38 кинозалында көрсөтүлүп, $2,27 миллион киреше тапты. Бул рекорддук көрсөткүч. 

Түркия бийлиги коронавирус илдетинин тездик менен көбөйүшүнөн улам чек араларын жабуу тууралуу маселени карап жатат. Алар жарандар жана туристтер үчүн ноябрь жана декабрь айында киргизилүүчү жаңы чектөөлөрдүн үстүнөн иштөөдө. Карантиндик эрежелер Стамбул жана башка ири шаарларда киргизилиши ыктымал. Өлкө бийлиги коменданттык саат киргизип, массалык иш-чараларга тыюу салып, эл аралык каттамдарды жабат. 

Польшада бойдон алдырууга тыюу салуу боюнча Конституциялык соттун чечимине каршы нааразычылык акциялары уланууда. Миңдеген жарандар жол тосуп, полиция менен кагылышууга катышып, өкмөттүн отставкага кетишин талап кылууда. Элдин пикиринде, бойдон алдырууга тыюу салуу - аялдардын ден соолугуна зыян келтирүүчү жашыруун бойдон алдырууну күчөтөт. Толкундоолор Варшава, Краков, Гданьск, Лодзи сыяктуу ири шаарларда күч алууда. 

Германиянын канцлери Ангела Меркель 2-ноябрдан декабрь айына чейин өлкөдө карантин киргизилерин маалымдады. Учурда Германияда коронавирус инфекциясы тездик менен көбөйүүдө. 

Мектептердеги күзгү каникул 2-ноябрдан 10-ноябрга чейин созулат. Бул тууралуу Билим берүү жана илим министрлигинин басма сөз кызматы билдирет.

КРдин президентинин милдетин аткаруучу Садыр Жапаров бүгүн Галина Байтеректи президенттин басма сөз катчысы кызматына дайындоо тууралуу жарлыкка кол койду. Галина Байтеректин өмүр баянын сунуштайбыз. 

КРдин Президентинин милдетин аткаруучу Садыр Жапаров кол койгон Жарлыкка ылайык, Галина Жумабековна Байтерек Президенттин  басма сөз катчысы болуп дайындалды. Бул тууралуу президенттин аппаратынын маалыматтык саясат бөлүмү билдирет.

АКШнын Луизиана штатында жүргөн куюндун кесепетинен аймактын 446 619 жашоочусу жарыксыз калды. "Зета" куюнуна байланыштуу Луизиананын губернатору Жон Бэл Эдварс өзгөчө кырдаал жарыялаган.