Бүгүн, 13-ноябрь күнү Өзбекстандын борбору Ташкент шаарында “Борбор Азия: жалпы руханий жана агартуу мурасы - жалпы келечек” аттуу эл аралык конгресси башталды. Иш-чарага Кыргызстан, Казакстан, Өзбекстан, Тажикстан, Түркмөнстан жана Азербайжан өлкөлөрүнөн 300дөн ашуун окумуштуулар, искусство таануучулар, адабиятчылар жана агартуу тармагынын өкүлдөрү катышууда.

Алгач Өзбекстандын Президенти Шавкат Мирзиёев катышуучуларды куттуктады.

Мамлекет башчысы өз кайрылуусунда Борбор Азия жана Азербайжан элдерин көп кылымдык достук жана бир туугандык байланышы, жалпы тарыхы жана маданий негиздери, бай руханий жана илимий мурасы бириктирерин баса белгиледи. Бул мурас дүйнөлүк цивилизациянын өнүгүшүнө зор салым кошконун айтты.

Шавкат Мирзиёевдин айтымында, конгрессти өткөрүү үчүн Ислам цивилизациясы борборунун тандалышы туш келди эмес. Бул өзгөчө интеллектуалдык-руханий комплекс аймактын үч миң жылдык даңктуу тарыхын, Биринчи жана Экинчи Ренессанс доорлорун, ошондой эле Жаңы Өзбекстандын азыркы өнүгүүсүн чагылдырат.

Президент белгилегендей, дүйнөнүн ар кайсы аймактарында карама-каршылыктар күчөп жаткан учурда тынчтыкты, туруктуулукту сактоо жана цивилизациялар аралык диалогду чыңдоо эң маанилүү милдет болуп саналат.

Конгрессте Кыргызстан тараптан Жазуучулар союзунун төрагасы Каныбек Иманалиев сөз сүйлөп, кыргыз адабияты жана маданиятындагы Ташкент шаарынын ордун белгилеп, кийинки жолугушуу Ысык-Көлдүн жээгинде улантыларын белгиледи.

Эл аралык конгресс 15-ноябрга чейин уланат.