Учурда дүйнөдө тынчтык жок, цивилизациялардын кармашы күчөп жатат. Ал эми Айтматов цивилизациялардын өз ара түшүнүшүүсү жөнүндө жазган. Бул тууралуу Жазуучулар союзунун төрагасы Ташкент шаарында өтүп жаткан эл аралык конгрессте айтты. 

«Биз Бириккен Улуттар Уюмунун Башкы ассамблеясына Чыңгыз Айтматовдун 100 жылдыгын утурлай 2028-жылды “Айтматов жылы” деп жарыялоону сунуштадык. Себеби бүгүн дүйнөдө тынчтык жок, цивилизациялардын кармашы күчөп жаткан учур. Ал эми Айтматов дал ошол цивилизациялардын өз ара түшүнүшүүсү жөнүндө жазган. Биз эмне үчүн БУУга кайрылдык? Анткени БУУнун негизги миссиясы - дүйнөдө тынчтыкты орнотуу. Учурда айрым өлкөлөрдө жаңжалдар болууда. Ал эми Айтматовдун чыгармалары - бул согушка каршы эң күчтүү курал болуп саналат. Өзгөчө “Саманчынын жолу” чыгармасындагы жер эненин образы - бул дүйнөдөгү бардык энелердин согушка каршы болгон кыйкырыгы. Демек Айтматовду кайра-кайра окуу аркылуу биз бул жер жүзүндө тынчтыкты сактай алабыз», - деди Каныбек Иманалиев. 

Белгилей кетсек, учурда Ташкент шаарында “Борбор Азия: жалпы руханий жана агартуу мурасы - жалпы келечек” аттуу эл аралык конгресси өтүүдө. Иш-чарага Кыргызстан, Казакстан, Өзбекстан, Тажикстан, Түркмөнстан жана Азербайжан өлкөлөрүнөн 300дөн ашуун окумуштуулар, искусство таануучулар, адабиятчылар жана агартуу тармагынын өкүлдөрү катышууда.