Медербек Сатыев Президенттин аппаратынын жетекчисинин биринчи орун басары болуп дайындалды. Ал Бишкек шаардык сотунун мурдагы судьясы.

Кыргызстанда доллардын курсу кайрадан жогорулады. Бүгүн коммерциялык банктарда америка доллары 81,4 сомдон сатылууда. Бир жуманын ичинде доллар 1 сомго кымбаттаган. Улуттук банк долларды 80,6 сомдон сатууда. Белгилей кетсек, Улуттук банк акыркы жолу 15-октябрда улуттук валютаны колдоо боюнча интервенция жүргүзгөн. Анда банк 17,1 млн доллар саткан.

Испания өкмөтү түнкү саат 11ден тарта коменданттык саат жарыялады. Андан сырткары, 6 кишиден ашык чогулууга тыюу салынды. Өлкөнүн премьер-министри Педро Санчес чектөөлөр келерки жылдын май айына чейин уланышы керектигин билдирди. Коменданттык саат түнкү саат 11ден таңкы 6га чейин киргизилди. Бул убакыт аралыгында маанилүү себептер менен гана үйдөн чыгууга болот: балдар жана улгайган кишилерге кам көрүү, жумуш жана дары-дармек алууга. 

АКШнын Калифорния штатынын 100 миңден ашык тургуну эвакуацияга даярданууда. Жергиликтүү бийлик аймакта күч алып жаткан өрткө байланыштуу жашоочуларды башка жакка көчүүгө чакырууда. 

Кыргызстандын президенттигине талапкерлер бардык документтерди 6-декабрь күнү саат 00:00гө чейин тапшырышы керек. Бул тууралуу Борбордук шайлоо комиссиясынын төрайымынын орун басары Абдыжапар Бекматов билдирди.

Кадамжай районунун Үч-Коргон айылындагы жалпы дарыгерлер практикалык борборуна жаңы 2 тез жардам унаасы берилди. Бул тууралуу өкмөттүн Баткен облусундагы өкүлчүлүгүнүн басма сөз кызматы билдирет.

 Жалал-Абадда кычкылтек жана кычкылтек баллондору жетишсиз болууда. Кычкылтек суюктугун сатып алган бейтаптардын жакындары калаада бир гана жайда бар экенин, ал жерде дагы жетишпей, таппай жатышканын журналисттерге айтып беришти.