Бишкекте тамеки чегүүгө каршы рейд өттү. Муниципалитеттен билдиришкендей, рейд учурунда оюн-зоок жайлары текшерилип, "КРдин жарандарынын ден соолугун тамекини, никотинди керектөөнүн кесепеттеринен жана айланадагы тамеки түтүнүнүн жана аэрозолдун таасиринен коргоо жөнүндө" мыйзамдын талаптарын бузуу фактылары аныкталды.

Бүгүн Жалал-Абад облустук ички иштер башкармалыгынын 2023-жылдын 8 айында аткарган ыкчам кызматтык ишмердүүлүгүнүн жыйынтыгы чыгарылды.

23-сентябрь - Мамлекеттик тил күнүнүн 34 жылдыгына карата Ош шаарынын мэриясы мамлекеттик тилди даңазалаган, тарбиялык маанидеги видеороликтерге сынак жарыялайт. Ош шаардык мэриясынын басма сөз кызматынан кабарлашкандай, сынакка Ош шаарындагы мамлекеттик, жеке теле-радиокомпаниялар жана продакшн-студиялар катыша алат.

Жогорку Кеңештин Социалдык саясат боюнча комитети саламаттык сактоо министри кызматына Алымкадыр Бейшеналиевдин жана эмгек, социалдык камсыздоо жана миграция министри кызматына Гүлнара Баатырованын талапкерлигин жактырды.

Бүткүл дүйнөлүк тазалык күнүн утурлай Айжан Чыныбаева жетектеген "Eco Demi" коомдук фонду Ысык-Көлдүн жээктерин тазалап баштады. 10-сентябрь күнү болгон ишембиликке Альпинизм жана аскага чыгуу федерациясынын президенти Эдуард Кубатов да катышты. Жалпы 200гө жакын киши 3 тоннадан ашык таштанды чогулткан. Эскерте кетсек, Бүткүл дүйнөлүк тазалык күнү 16-сентябрь күнү өтөт. 

Белгилүү режиссер Руслан Акундун "Салам, Европа" тасмасынын премьерасы ноябрь айында Кыргызстанда жана Казакстанда болот. Башкы ролду КРдин эл артисти Айтурган Темирова ойногон. Фильм комедия жанрында. Бул Европада жашаган небересине автостоп менен барган чоң эне менен чоң ата жөнүндөгү тасма. Алар жолдо көп окуяларга туш болушат. Күлкүлүү окуялар ортосунда чоң эне менен чоң атанын небересине берген таалим-тарбиясы баяндалат.

Кыргызстанда кыргыз тилин түшүнгөн жасалма интеллект иштелип чыкты. Долбоордун максаты - жасалма интеллекттин жардамы менен санариптик чөйрөдө кыргыз тилин өнүктүрүү. Ар бир жаран шилтеме аркылуу өтүп, beta версиясын тестирлеп көрсө болот.