Учурда WhatsApp тайпаларда ата-энелер арасында мектептердин ачылышы боюнча сурамжылоо жүргүзүлүп жатат. Айрым ата-энелердин айтымында, көпчүлүк салттуу окууга каршы. 

Кечээ күндөн баштап Бишкектеги мектептердин ачылышы боюнча мугалимдер WhatsApp тайпаларда сурамжылоо жүргүзө баштады. Маалыматка ылайык, көпчүлүк ата-энелер окуунун онлайн түрүн тандоодо. Анткени, акыркы учурда балдар арасында көп каттала баштаган пневмония илдети ата-энелерди чочутуп жатат. Буга чейин Кыргызстанда 15 баладан Кавасаки синдромуна окшош оорунун белгилери аныкталган. Ал эми азыр 2 144 мектепте окуучулар салттуу билим алууда.

Эскерте кетсек, Кыргызстанда 18-февралга карата, бир суткада коронавирус 70 адамдан табылып, бир бейтап каза болду. Бул тууралуу Республикалык штабдан билдиришти. 

Маалыматка ылайык, коронавирус Бишкекте – 26, Чүй облусунда – 17, Ош облусунда – 6, Талас облусунда – 2, Нарын облусунда – 3, Ысык-Көл облусунда – 10, Жалал-Абад облусунда – 3, Баткен облусунда – 3 кишиден табылган.

Ал эми бир сутка ичинде 73 адам коронавирустан айыгып чыккан.

“Бишкекте 34, Ош шаарында - 1, Чүй облусунда – 22, Ысык-Көл облусунда – 9, Нарын облусунда – 4, Жалал - Абад облусунда – 2, Баткен облусунда – 1 киши коронавирустан айыгып чыкты”, - деп айтылат штабдын билдирүүсүндө.

Сутка ичинде COVID-19 илдетинен Бишкекте – 1 адам каза болду.

Бүгүнкү күнү стационарларда коронавирустан 418 бейтап, амбулатордук түрдө 360 адам дарыланууда.

“Бир сутка ичинде өлкө боюнча медициналык кызматкерлер арасында коронавирус жуктуруп алган 4 учур катталды. Пандемия башталгандан бери 4 миң 201 медицина кызматкери коронавирус жуктуруп алган, алардын ичинен 4 миң 132 медкызматкер айыгып чыкты”, - деп билдирет штаб.

Кыргызстанда пандемия башталгандан бери 85 миң 689 адам коронавирус жуктурган. Алардын ичинен 82 миң 525 киши айыгып чыкса, 1 миң 447 адам каза болду.