Кечээ күнү Бишкектеги Эне жана баланы коргоо улуттук борборуна бир суткада 32 бала пневмония менен келип түштү. Бул маалыматты аталган оорукананын директору Камчыбек Узакбаев тастыктаган.

Анын айтымында, учурда жалпысынан пневмония менен ооруган 150 бала дарыланууда. Алардын баары Эне жана баланы коргоо улуттук борборунун Тоголок Молдо көчөсүндөгү филиалында жатат.

Ал арада ата-энелер мектептердин ачылышын Бишкек мэриясынан талап кылууда. Борбор калаанын вице-мэри Айжан Чыныбаева бир канча күн мурун ата-энелер менен жолугушкан учурда мектептердин ачылышы боюнча талаш-тартыш орун алган. Анда, ата-энелер салттуу окууга өтүүнү талап кылышкан. Бирок, Чыныбаева мектептерди ачууга аракеттер болгонун билдирип, мындан улам балдар жана мугалимдер оору жуктуруп алганын айткан.

Дарыгер, серепчи Кубанычбек Калпаев учурда кырдаал курч экендигин билдирет. Мектептердин ачылышы вирустун кеңири жайылышына шарт түзөт дейт.

“Кечээ күнү эле пневмония менен бир күндө 30дай бала түштү. Бул селт эттирбей койбойт. Буга чейин Кавасаки оорусу менен катталган балдар болду. Анан ушул кырдаалды көрүп-билип туруп мектептер ачылсын деп талап коюу туура эмес. Андан көрө онлайн окууну ар тараптан өнүктүрүп, билимди бышыктоо керек”, - дейт Калпаев.

Буга чейин Кыргызстанда 15 баладан Кавасаки синдромуна окшош оорунун белгилери аныкталган.

Учурда Кыргызстанда 2 144 мектепте окуучулар салттуу билим алууда.