Бишкектин транспорт жана муниципалдык менчик боюнча вице-мэри Азиз Алымкулов "Бишкек монорельстүү транспорттук тутум" долбоорун сунуштады.

Мэриядан билдиришкендей, долбоор шаардык транспорттун сапатын жана туруктуулугун, ошондой эле жол коопсуздугун жогорулатууга багытталган.

Вице-мэр мындай тутумдун артыкчылыгы анын жүк көтөрүмдүүлүгү, айлана-чөйрөгө ыңгайлуулугу, коопсуз кыймылы экендигин жана курулушу Ала-Арча жана Аламүдүн дарыяларын бойлой пландаштырылып жаткандыгын белгиледи.

Долбоор боюнча жалпы узундугу 37 км, станциялар 32, линиялардын саны 2, жүк ташуу сыйымдуулугу 150дөн 180 жүргүнчүгө чейин, бийиктиги 5-7 метр.

Белгилей кетсек, монорельс - бул тез жүрүүнү камсыз кылган темир жол транспорту, асма транспорттун бир түрү.