Жарандарга үйдү айылдын 1985-жылы туулган классташтар тартуулашты.  Бул туурасында аталган үйгө салым кошкон Сабырбек Самидин уулу KEREEZ.KGге  билдирди. Анын айтымында, Гүлчө айылындагы  эң жакыр  үй-бүлөлөрдү аныктоодо атайын сурамжылоо жүргүзүлүп, 15 үй бүлө аныкталган.

Бул тууралуу Сабырбек Самидин уулу: "Сурамжылоо жүргүзүлгөн үй-бүлөлөрдүн ичинен жалгыз бой  Жамиля Орозбаева менен Сайракан Темирбаева турак жайсыз экени маалып болуп, маселени чечип берүүнү колго алдык. Жалпы Гүлчө айылындагы классташтар биригип, эки үй бүлөгө 3 айдын ичинде 1.5 млн сомдук үйдү куруп, бүгүн ээлерине тапшырдык. Буга чейин айылдагы мектеп интернетына кийим кечек жана тамак аш менен кайрымдуулук кылып келебиз. Максатыбыз жаш муунду кайрымдуулукка үндөө. 2021- жылга атайын кайрымдуулук фонд ачуунун үстүндө иштеп жатабыз. Ошондой эле үй алган эки айымдын тамак аш менен камсыздап туруу маселеси такай биздин көзөмөлдө болот" деп, - билдирди.

Экинчи топтогу майып Жамиля Орозбаева: "Көп жылдар бою батирлерде жашап келдим . Үйлүү болуу үчүн бир канча жолу өкмөткө кайрылып, бирок оңдуу жооп ала алган эмесмин. Мынтип, кайрымдуу инсандардан күтүүсүз жерден үй алып, кубанычым койнума батпай отурам. Мүмкүнчүлүгүмдү чектелгенин эске алышып, үйдү бардык шарттары менен куруп беришти. Айылдаштарга терең ыраазычылык билдирем" деди.