Бүгүн, 9-декабрь Чемпиондор Лигасынын тайпалык баскычтагы акыркы турдук оюндары өттү. Парижде "Парк дэ Пренс" стадионунда өткөн "Н" тайпасындагы ПСЖ - Истанбул Башакшехир футболдук беттеши жаңжал менен коштолуп, эки команда тең футбол талаасын таштап кетишти.

Маалыматка көрө, эки команданын оюнчуларынын талааны таштап кетишине капталдагы калыс Себастьян Колцеску "Истанбул Башакшехир" клубунун камерундук оюнчусу Пьер Вебону "сен карасың" деп айтканы себеп болгон. Футболчулар муну "расизм" деп атап, оюн талаасын таштап чыгып кетишти. 

"ПСЖ" командасынын оюнчулары да "Истанбул Башакшехир" клубун колдоп, талаадан чыгып кетишти. Буга чейин футбол тарыхында мындай окуя болгон эмес. Түрк футбол клубу бул окуяга дароо "Расизмге жол жок" деген билдирүү менен социалдык тармактан реакция кылды.

УЕФА бүгүн, 9-декабрда өткөн Чемпиондор Лигасындагы Франциянын "ПСЖ" жана Түркиянын "Истанбул Башакшехир" командаларынын ортосундагы расисттик жаңжал боюнча билдирүү таратты. 

Билдирүүдө, УЕФА Чемпиондор Лигасынын бүгүнкү "ПСЖ" менен "Истанбул Башакшехир" оюнунда болуп өткөн окуядан кабардар. "УЕФА бул боюнча кылдат иликтөө жүргүзөт. Футболдо расизмге жана басмырлоого жол берилбейт”, - деп жазылган.