Жалал-Абаддын эки спортчусу самбо боюнча дүйнөлүк биринчиликте коло медаль утуп алышты. Бул тууралуу Turmush басылмасы жазып чыкты. 6-ноябрь күнү Сербиянын Нови-Сад шаарында өткөн турнирде алдыңкы орунду багындырган спортчуларды Сузак районунун тургундары облустагы Өкмөттүн ыйгарым укуктуу өкүлү Абсатар Сыргабаев менен бирге салтанаттуу тосуп алышты. 

Маалыматка ылайык, чемпионатка Кыргызстандан 30 спортчу катышып, алардын жетөө медаль алышкан. Сузак районунан барган спортчу Медербек Сапарбек уулу жеңишке жетүү оңой болбогонун айтат. 

"Турнирде 22 өлкөнүн спортчулары күч сынашты. Сербияга 5-ноябрь күнү учуп кеттик. 62 кг салмакта күрөштүм. Биринчи атаандашым монгол улутундагы самбочу болду, экинчиси - сербиялык спортчу. Финалда болсо орус самбочу менен күрөштүм", - дейт Медербек Сапарбек уулу. 

Нурбек Бекбердиев да коло медаль жеңип алды. 

"Ушул жылдын февраль айында Кыргызстанда күжүрмөн самбо боюнча биринчилик болгон. Андан 1-орунду багындыргам. Спорттун бул түрү менен 2010-жылдан бери машыгып келем. 2017-жылы Жалал-Абад шаардык ИИББнын "Шумкар" атайын багыттагы полкуна жумушка орношуп, бош учурда машыгып жүрдүм. Сербияга да жетекчилигимдин жана кесиптештеримдин жардамы менен бардым", - дейт Н.Бекбердиев.