Кыргызстандын Тышкы иштер министри Чыңгыз Айдарбеков БУУнун башкы катчысынын Борбор Азиядагы өкүлү жана БУУнун Борбор Азиядагы аймактык дипломатиялык борборунун башчысы Наталья Герман менен телефон аркылуу сүйлөштү. Бул тууралуу ТИМдин маалымат кызматы билдирди.

Сүйлөшүүдө баш катчынын атайын өкүлү БУУ дайыма Кыргызстандын ишенимдүү өнөктөшү бойдон каларын айткан. Ошондой эле, Бириккен Улуттар Уюму өлкөдөгү саясий кырдаалды тынчтык жолу менен жөнгө сала турган жалгыз адам Кыргызстандын легитимдүү президенти Сооронбай Жээнбеков экенин баса белгилеген. Ошондой эле, ал өлкөдөгү конституциялык бийликтин жалгыз өкүлү экенин да кошумчалаган.

«Президент бардык саясий күчтөрдүн, калктын калың катмарынын, жарандык коомдун жана жаштардын ортосундагы орток пикирдин негизинде баарын мыйзамдуу жолго салуусуна ишеним чоң. БУУнун баш катчысы Антониу Гутерриш да Кыргызстандагы окуяларга көз салып турат. Ал 6-9-октябрдагы билдирүүлөрүндө БУУ Кыргызстандын саясий кризистен конституциялык жолдун негизинде чыгуусуна жана тез арада кайрадан өткөрүлө турган парламенттик шайлоону уюштурууга жардамга даяр экенин билдирген», — деп айтылат маалыматта.

Ал эми Кыргызстандын Тышкы иштер министри Чыңгыз Айдарбеков да президент бардык күч-аракеттерин өлкөнүн мыйзамдуу талаага кайтуусу үчүн жумшап жатканын билдирди.