Айыл чарба багытында ийгилик жаратып, "Кыргыз ЭКО продукт" ишканасын түптөп, бүгүнкү күндө натыйжалуу иштеп жаткан Аллаяр Бостонов ийгилиги менен бөлүштү. 

"Мамлекеттик деңгээлде ар бир айыл өкмөттөргө логистикалык борборлорду, калктын өндүргөн продукциясын сатып алуу жана муздаткычта сактап берүү борборлорун уюштуруу... Ар бир үй-бүлөнүн жеке менчик жана үлүш жерлерине аталган система менен айыл чарбасын өнүктүрүүнү мобилдүү жайылтуу... Көп жылдык тажрыйбама негизделип, бул багытта элге абадай керек болуп турган долбоорлорумду сунуш кылам.

20 жыл мурда үй-бүлөбүз менен какыраган талааны өздөштүрүп, түтүк аркылуу суу тартып, коңшу өлкөдөн тез мөмө берүүчү көчөттөрдү алып келип тиккенбиз. Чет өлкөдө түрдүү тренинг, семинарда үйрөнгөн ыкмалар менен суу топтоочу резервуар орнотуп, тамчылатып сугарууну өздөштүрдүк. Биз өстүргөн бак мөмө бере баштагандан кийин “Кыргыз ЭКО продукт” ишканасын түптөп, үй-бүлөлүк бизнеске айланттык. Демек агрардык тармакка көңүл буруп, ишти мамлекеттик деңгээлде уюштуруп, ар бир үй-бүлөнүн кирешесин көбөйтсөк болот.

Ошондой эле, Кыргызстанда өскөн мөмө-жемиштерди кайра иштетүүчү заводдорду курууну мобилдештирүүнү сунуштайм.

Учурда биз иштеткен завод гилас, өрүк, алма, помидор, бадыраң жана башка мөмө-жемиштердин ширесин жана вареньесин консервациялап, 36 түр продукцияны ички рынокко жана чет жакка экспорттоп жатабыз. Биздин продукция сапаты жагынан Кыргызстандагы жана бир катар эл аралык сыйлыктарга ээ болгон", - дейт Аллаяр Бостонов. 

АЛЛАЯР БОСТОНОВДУН ӨМҮР БАЯНЫ

Аллаяр Бостонов 1989-жылдын 10-августунда Жалал-Абад облусунун Сузак районуна караштуу Кара-Дарыя айылында туулган. Ош шаарындагы “Себат” лицейинде билим алган. Жогорку билимди Б.Ельцин атындагы Кыргыз-Россия славян университетинде алып, экономика факультетин ийгиликтүү аяктаган.

2011-2013-жылдары “Лаперуза”, андан соң “Нур-Ойл” ишканасында менеджер болуп иштеген.

2013-жылы мөмө-жемиш ташуучу менчик ишкананы түптөп, эл аралык каттамга жол ачкан.

2015-жылдан бери айыл чарба багытында натыйжалуу иш алып барып, “Кыргыз ЭКО продукт” ишканасын жетектеп, бүгүнкү күнгө чейин ийгиликтүү иштеп келет.

АЛЛАЯР БОСТОНОВДУН МАКСАТЫ

• Кыргызстан агрардык өлкө болгондуктан, айыл чарбасын дүйнөлүк рынокко алып чыгуу программасын иштеп чыккан;
• Эң эле биринчи калкты сапаттуу азык менен камсыздап, өлкөдө таза экосистеманы орнотуу;
• Дыйкандардын чарбасын кеңейтип, каржылык көз карандысыздыкка жеткирүү;
• Айыл чарба продукциясын инновациялык жол менен өндүрүүнү колго алуу;
• Экспорт маселесин чечүү.