Жактоочу, юридика жана политология илимдеринин доктору, профессор Канатбек Азиз Фейсбуктагы баракчасынан элди бөлүнбөөгө жана шайлоо учурунда оппоненттерин "бузуку" ыкмалар менен компромат издөөдөн алыс болууга чакырды. 

“Баарыңыздарды шайлоо учурунда саясий маданияттын чегинен чыкпоого чакырам. “Бузуку” ыкмалар менен арзан компроматтарды издебегиле. Биз ар башка саясий уюмдардын өкүлүбүз, ар башка мүдөөнү көздөйбүз, жадагалса баалуулуктарыбыз да дал келбеши мүмкүн. Бирок, биз бир элбиз, муну унутпашыбыз зарыл!. Биз бөлүнбөшүбүз керек! P. S. Ыплас нерселерди токтотулучу, суранам. 2020-жылдын 4-октябрынан кийин да жүз карашалы”, - деп жазган Канат Азиз.

Эскерте кетсек, «Мекеним Кыргызстан» партиясынан депутаттыкка талапкер Канатбек Азиз 7-сентябрда «News.kg» интернет порталына маек куруп, анда аймактар аралык араздашууну козуткан сөздөрдү сүйлөдү, - деп социалдык тармактарда кызуу талкууга алынган.

Канатбек Азиз — юрист жана «Мекеним Кыргызстан» партиясынан депутаттыкка ат салышып жаткан талапкер. Партиянын тизмесинде ал биринчи жыйырмалыктын 15-сабында турат. Алмазбек Атамбаев президент болуп турганда оппозициячыл «Ата Мекен» партиясынын лидери Өмүрбек Текебаевдин кызыкчылыгын коргогон.

Юридика жана политология илимдеринин доктору, профессор. 2019-жылы Канатбек Азиз Жогорку аттестациялык комиссиянын төрага орун басары болуп дайындалып, бул кызматта 2020-жылдын январына чейин иштеген.