Кечээ, 3-сентябрда Борбордук шайлоо комиссиясы (БШК) “Бүтүн Кыргызстан” партиясынын 4-октябрда өтүүчү парламенттик шайлоого катышуусуна тыюу салды.

Жыйында БШКнын көпчүлүк мүчөсү “Бүтүн Кыргызстан” партиясынын шайлоого катышуусуна каршы добуш беришти. БШКнын 9 мүчөсү аталган партияны жарыштан четтетүү чечимин кабыл алса, 2 мүчөсү каршы добуш берди. Жыйынтыгында БШКнын иш тобу “Бүтүн Кыргызстан” партиясынын тизмесин каттоодон өткөрбөөнү туура көрүштү. Партиянын съездиндеги катталган тизме менен БШКга тапшырган талапкерлердин тизмесинде айырмачылыктар болгону мындай чечим чыгарууга түрткү болгонун БШКнын мүчөсү Медина Кутбердиева билдирди.

Эске салсак, буга чейин экс-акыйкатчы Турсунбай Бакир уулу БШКдан “Бүтүн Кыргызстан” партиясынын тизмесин каттоодон баш тартууну талап кылган. Анын айтымында партиянын лидери Адахан Мадумаров тизменин катарын өзгөртүп, андан Турсунбай Бакир уулун алып салган. Бирок, БШК Бакир уулунун суранычын канааттандырбай ага сотко кайрылып,  партиянын ичиндеги пикир келишпестиктерди сот аркылуу чечишип алууну сунуштаган.

Мындай чечимди партиянын лидери Адахан Мадумаров мыйзамсыз деп баалады. “Биз мыйзамдуулук, ынтымак деп келип ушул күнгө жеттик. Мен бүгүн бул өлкөдө мыйзам менен эч нерсеге жетише албайсың дегенге терең ищендим. Эми эл өз тагдыры, өз укугу, өз келечеги үчүн күрөшкө чыгыш керек. Сот, мыйзам менен эч нерсеге жетише албаган өлкөгө айландык. Бүгүн БШК аны далилдеди. Атыр Абдрахматова канчалык какшап, жок дегенде токтомуңарды көрсөткүлөчү десе да көрсөтпөй коюшту. Колунда жок токтомго кантип добуш берсе болот? Мыйзамды БШК одоно түрдө бузду. Ошол жумушчу топтун мүчөсү, юридикалык илимдердин доктору Кайрат Осмоналиев жумушчу топтун жыйынына катышкан жокмун, кол койгон жокмун деп жатат. Анда булар кайсы токтомго добуш беришти? Партиянын 100 миңдеген колдоочулары бар. Алардын укугун ким коргойт? Эртеңден баштап ар бир Кыргыз жараны өз укугу үчүн өзү күрөшкө чыгыш керек”,- деди ал.