Бул тууралуу БШКнын көз карандысыз 12 мүчөсүнүн бири Атыр Абдрахматова ата мекендик телеберүүлөрдүн бирине талдоочу катары маек берип жатып билдирди.

Анын айтымында, бүгүнкү күндө шайлоо системасында орун алып жаткан кээ бир көрүнүштөр көп нерседен кабар берет. “Эгер эсиңиздерде болсо, мен бул шайлоонун мөөнөтүн жылдыруу демилгесин көтөрүп чыккам. Биринчиден пандемия шартында шайлоо мыйзамдарынын пайдаланылышы кош стандарттуу болуп жатат. Эмнеге андай болуп жатканын сурасаң, пандемияга байланыштуу анча-мынча нерселерге көз жумуп коёлу деген мааниде кептер айтылууда. Экинчиден биздин мигранттардын укугу кайрадан эле тебеленип калды. Үчүнчүдөн саясий партияларга тең укуктуу шарт түзүлгөн жок. Мисалы кечээ түнү БШКга адамдарды киргизбей, бюрократия жаратуунун эмне кереги бар эле? Ошондой эле Боршайком учурда бир да жыйынын түз алып берип көрсөтө албай жатат. Акча жок дешет. Жөнөкөй эле уюлдук телефонду колдонуп түз алып берүү уюштурса болот. БШКда эмне маселелер каралып жаткандыгы жөнүндө маалымат жок. Эч ким билбеген кайдагы кишилер жана уюмдар көз карандысыз байкоочу катары бекитилген. Шайлоо мыйзамдары да татаалдаштырылган. Ушуга байланыштуу алдыдагы шайлоонун адилеттүү өтүүсүнөн күмөнүм бар”,- деди Атыр айым.