Бул тууралуу бүгүн, 25-августта Боршайкомдун отурумунун жыйынтыгында белгилүү болду.

Отурумда БШКнын 9 мүчөсүнүн 8и “Кыргызстан” партиясынын документтери кеч алып келингендиктен кайтарылсын деп добуш берди. Буга чейин БШК парламенттик шайлоого катышып жаткан бардык партиялар 24-август күнү саат 18.00гө чейин шайлоо күрөөсүн төлөп, депутаттыкка талапкерлердин тизмесин көрсөтүшү керек экендигин эскерткен.

Мындай чечимге “Кыргызстандын” лидери Канат Исаев макул эместигин билдирип, партия эми сотко кайрыларын айтты. Ал тизменин кечиктирилишин техникалык ката деп баалап, “Кыргызстан” партиясынын шайлоочулардын укугун тебелегендик деп айтты.

Эске салсак, кечээ, 24-августта “Кыргызстан” партиясынын документтери белгиленген убакыттан кеч тапшырылгандыгы тууралуу маалымат тарап, 24-августтан 25-августка караган түнү Жогорку кеңештин депутаттары, партиялардын өкүлдөрү, журналисттер жана активисттер БШКнын имаратынын алдына чогулуп, алар БШКдан “Кыргызстан” партиясы документтерин өз убагында тапшырганы тууралуу далилдерди талап кылышты. Жыйынтыгында БШК атайын отурум өткөрүүгө мажбур болгон.