“Коопсуз шаар” долбоорунун экинчи бөлүгүн ишке киргизиш үчүн курулуш-монтаж иштери башталды. Бул тууралуу Маалыматтык технологиялар жана байланыш боюнча мамлекеттик комитет билдирди.

Комитеттин маалыматына ылайык, 21-августта Бишкек шаарынын Алыкулов-Ахунбаев көчөлөрүнүн кесилишине стационардык аппарат комплексин сыноо режиминде орнотуу башталган. “Коопсуз шаар” долбоорунун экинчи бөлүгү пандемияга байланыштуу айтылган мөөнөттөн кеч башталып, жети облусту, эки ири шаарды, 15 кичи шаарды жана 73 калк жашаган аймакты камтыйт. Жалпысынан 306 аппарат орнотулат.

2020-жылдын январь айындагы өкмөттүн маалыматына ылайык, Кыргызстанда “Коопсуз шаар” долбоору ишке кирген 2019-жылдын март айынын тартып жол эрежесин бузган айдоочулар төлөгөн айыппулдун жалпы суммасы 592 миллион сом болгон.

“Коопсуз шаар” долбоору Бишкекте 2019-жылы 12-февралда ишке кирип, март айынан тартып жол эрежесин бузгандарга айыппул салына баштаган. Жолдорго, көчөлөргө жол эрежесин бузган автоунааларды каттаган видео байкоо камералары орнотулган. Долбоордун биринчи баскычын орусиялык “Вега” концерни ишке ашырса, “Коопсуз шаар-2” үчүн тендер жарыяланып, анда кытайлык “Shenzhen Sunwin” компания жеңүүчү аталган.