Ош облусунун аймагында уюшкан кылмыштуу топтун мүчөсү кармалды. Бул тууралуу Ош ОИИБдин басма сөз кызматы билдирди. Маалыматка караганда, 2023-жылдын 14-октябрында Кара-Кулжа РИИБге аталган райондун тургуну арыз менен кайрылган. 

Ал ушул жылдын май айында З.К. аттуу жаран анын мал-жандыктарын алып, ушул күнгө чейин акчасын бербей, качып жүргөнүн билдирген. Бул факты боюнча Кылмыш-жаза кодексинин 209-беренесинин (алдамчылык) негизинде кылмыш иши козголгон. 

Кылмыш иликтөө бөлүмүнүн кызматкерлери тарабынан жүргүзүлгөн ыкчам иш-аракеттердин натыйжасында уюшкан кылмыштуу топтун мүчөсү катары ИИМдин каттоосунда турган, буга чейин бир нече жолу кылмыш жообуна тартылган 1980-жылы туулган З.К. аттуу жаран кармалып, камакка алынды. 

Мындан сырткары, кармалган жаран Кылмыш-жаза кодексинин 283-беренеси (баңгизат каражаттарын, психотроптук заттарды жана алардын аналогдорун сатып өткөрүү максатында мыйзамсыз даярдоо) боюнча да шектелүүдө. 

Учурда шектүүнүн шериктерин жана башка кылмыштарга тиешеси бар же жоктугун аныктоо иштери жүргүзүлүп жатат.