Кечээ, 19-августта “Биримдик” партиясы IV съездин өткөрдү. Жыйында КРдин эмгек сиңирген артисти Галина Кетова билдирүү жасады. Ал билим берүү жана саламаттыкты сактоо системалары реформалоого муктаж экенин белгиледи.

Анын айтымында, бүгүнкү күндөгү көйгөйлөр коомубуздун маданий, интеллектуалдык, агартуучулук жана ыйман жактан кризиске кабылып, деңгээли түшүп кеткени менен байланыштуу.

“Ошондуктан билим берүү, илим жана маданият мамлекет кам көрө турган башкы тармакка айланышы керек. Кыргызстандын маданиятын өнүктүрүү жана сактоо боюнча комплекстүү программа зарыл. “Биримдик” бул багытта олуттуу максаттарды көздөйт”,- деди Г. Кетова.

Депутаттыкка талапкер айым медицина жеткиликтүү болушу керектигин баса белгиледи. Өз сөзүндө ал экология жана тышкы саясатка байланышкан маселелерге да токтолду. “Экологиялык көйгөйлөрдөн улам айыл-чарбабызда азык-түлүктөрдүн саны азайып, мунун баары адамдардын ден-соолугуна терс таасирин тийгизиши мүмкүн. Бүгүнкү күндө экологиялык көйгөйлөр мамлекеттик коопсуздук маселесине айланып баратат десем жаңылышпайм”,- деп билдирди ал.

Кошумчалай кетсек, парламенттик шайлоого карата үгүт иштери 4-сентябрда башталат.