Орус бийлиги адам ресурсун жоготууну жана эң негизгиси, Орусиянын ичиндеги массалык нааразылык коркунучун азайтуу максатында орус жарандарын мобилизациялоону улам кийинкиге калтырууда. Анткени, Орусиянын калкы боордош эл менен болгон аскердик операцияга каршы жана ага катышууну каалабайт. Буга байланыштуу орус бийлиги Борбор Азиядан келген эмгек иммигранттарына кайрылып, аларды “атайын аскердик операцияга” катышууга тартууга аракет кылган. Борбор Азиядан келген иммигранттардын көпчүлүгү иштегенге уруксаты жок жана иммиграция эрежелерин бузуп жүргөндүктөн кайырмакка оңой илинет. Алар орусиялык укук коргоо органдары жана атайын кызматтардан коркуп, эч качан Украинадагы аскердик операцияга тартуу аракетине каршылык билдирип чыга алышпайт. Анын үстүнө “Вагнер” өңдүү орусиялык жеке жалданма компаниялар азыр социалдык тармактардын кыргыз, тажик жана өзбек сегменттери аркылуу Борбор Азиянын жарандарын (эмгек иммигранттарын эмес) тартууга аракет кылып жатышат. Жалпыга маалымдоо каражаттары орусиялык агенттердин Борбордук Азиянын жарандарын Украинадагы согушка азгыруу аракети күчөп жатканы тууралуу байма-бай  жазышууда. Бул көрүнүшкө каршы туруу үчүн Борбор Азия өлкөлөрүнүн бийлиги кызматташып, маалымат алмашып турушу зарыл. Кызматка тартууга жана аскердик пропагандага каршы күрөшүү үчүн орус-украин согушуна катышуунун кесепеттери жөнүндө түшүндүрүү иштерин жүргүзүп, мындай аракеттер үчүн жазаны күчөтүү кажет.