2023-жылдын 3-апрель күнү Ош облусунун Ички иштер башкармалыгы Баткен облусунда «SAFEWORLD» жана эл аралык толеранттуулук фонду өткөргөн  "Заманбап" аталышындагы фестивалга Ош облусунун атынан барып катышкан таланттуу окуучуларды жана аларды окутуп, даярдаган мугалимдерди баалуу белектер менен сыйлады. 

Иш-чара өспүрүмдөрдү коомдук иштерге активдүү катышууга үндөө максатында өттү. Жаштардын бүгүнкү күнүнө жана келечегине улуу муундан үмүт арттырып, өлкө келечеги үчүн жоопкерчиликтүү мамиле жасоого багыт берүү болуп саналат. Башкармалыктын начальниги, милициянын полковниги Ж.Жоробеков аталган фестивалда өз өнөрлөрүн тартуулоо менен көрүүчүлөрдүн купулуна толуп, алкышка арзыган окуучуларды жетишкендиктери менен куттуктады. Ал бул ийгиликтерде мугалимдердин эмгегин жогору баалады. 

"Мугалим -  бул кесиптердин сереси,
Мугалим - бул кесиптердин төрөсү.
Мугалимдер сыйкырдуу бир дарактай,
Жайдыр-кыштыр бышып турган мөмөсү", - дегендей, урматтуу мугалимдер жаштарга билим берүү, туура жол көрсөтүүдөгү жооптуу жана түйшүктүү кызматыңыздарда сиздер жалгыз эмессиздер. Беш манжа бөлөк, билек бир. Баарыбыз башка, тилек бир дегендей, педагогдор, укук коргоо органдары жана коомчулук жаштарга татыктуу билим, тарбия жана туура багыт берүү аркылуу мамлекетке ак ниет менен кызмат кылуучу, элдин керегине жараган, келечекке жоопкерчиликтүү көз караш менен караган мекенчил жаштарды тарбиялоо - жалпыбыздын милдетибиз", - деди Жоробеков. 

Өз кезегинде сыйлык ээси болгон Ноокат районундагы М.Нурматов атындагы орто мектебинин мугалими Гүлшаир Абилова жаштарды коомдук иштерге  тартуу өтө зарыл экендигин, иш-чараларга катышуу менен жаштар терс адаттардан оолак болуп, өмүр жолунда туура жолун тандап алууга мүмкүнчүлүк түзүлөрүн айтып өттү. Ал эми Кара-Суу районундагы №46 С.Маматов атындагы орто мектебинин 8-классынын окуучусу Муслима Алимова: "Акыркы убактарда жаштарды туура жолго багыттоодо уюштурулуп жаткан иш-чараларга активдүү катышуу менен милициянын аткарып жаткан жумуштарын баалап, алардын аракетинде чыныгы камкордукту сезип, сый-урматка бөлөнгөн жылуу сезимдер пайда болду", - деди.