Бишкекте «Билим берүүнүн сапатын жогорулатуу – Кыргызстандын өнүгүүсүнүн негизи» аталышындагы тегерек стол болду.

Иш-чарага мамлекеттик жана жергиликтүү өз алдынча башкаруу органдарынын өкүлдөрү, жогорку окуу жайлардын администрациялары, мамлекеттик башкаруу боюнча эксперттер, коомдук ишмерлер, КРдин Президентине караштуу мамлекеттик башкаруу академиясынын бүтүрүүчүлөр ассоциациясынын мүчөлөрү, магистранттар жана студенттер катышты.

Иш-чара билим берүү системасынын учурдагы абалы, адистерди даярдоо, билим берүүнүн сапатын жогорулатуу, кадр саясатынын ырааттуулугун камсыздоо жана эмгек рыногуна басым жасоо маселелерин талкуулоо. Негизги маселе - мамлекеттик башкаруу жана жеке сектор үчүн жогорку квалификациялуу кадрларды даярдоо максатында өттү.

Тегерек столдо Жогорку Кеңештин мурдагы депутаты Аалы Карашев сөз сүйлөп, билим берүү жана кадрларды даярдоо боюнча бир катар далилдүү сунуштарын берди. Карашев кесиптик лицейлердин кадрларды даярдоо мөөнөтүн азайтуу максатка ылайык экенин жана бир кесиптин ээси болуу үчүн максималдуу 6 ай керектелерин баса белгиледи. Андан сырткары, эмгек рыногу талап кылган гана кадрларды даярдоо зарылчылыгы зор жана абалды алдын-ала көрө билүү керек. Ошондой эле, билим берүү боюнча коммуникациялык кеңеш түзүү, мамлекеттик жана муниципалдык кызматкерлерди кайра даярдоо боюнча мамлекеттик заказ маселесин калыбына келтирип, кайра колго алуу керектигин сунуштады.

Иш-чарада билим берүү тутумун жакшыртуу боюнча талкуу болуп, анын жеткиликтүүлүгүн камсыз кылуу керектиги талкууланды. КРдин Президентине караштуу мамлекеттик башкаруу академиясынын бүтүрүүчүлөр ассоциациясынын төрагасынын орун басары С.Ашымов ассоуиациянын аткарган жумушу жана ишке ашырган долбоорлору тууралуу баяндама жасады. Кадрларды даярдоонун учурдагы абалы жана негизги багыттарын аныктоо боюнча академиянын ректорунун кеңешчиси Б. Сагынбаев айтып берди. 

Тегерек стол суроо-жооп менен жыйынтыкталып, алдыда натыйжалуу долбоорлорду ишке ашыруу керектиги белгиленди.