Таажы вирусу өмүрүн билим берүүгө арнаган, агартуу тармагына эмгеги сиңген, билим берүүнүн отличниги Каныбек Эшматовду 64 жашында алып кетти.

Каныбек Эшматов 1956-жылы 16-июнда Ош облусунун Өзгөн районунун Куршаб айылында жарык дүйнөгө келген. 1973-жылы орто мектепти аяктап, Ош мамлекеттик педагогикалык институтунун физика-математика факультетине тапшырган. 1977-жылы жогорку окуу жайды ийгиликтүү аяктаган соң, бүт өмүрүн билим берүү тармагына арнап, агартуу системасында үзүрлүү эмгектенген. Акыркы жылдары билим берүү тармагындагы "Демилгелерди колдоо" фондунун түштүк аймагы боюнча жетекчиси болуп иштеп жүргөн. Билим берүүнүн отличниги, Куршаб айылдык кеңешинин 4 жолку депутаты, агартуучу Каныбек Эшматовдун мезгилсиз дүйнө салгандыгына байланыштуу Куршаб айылынын тургундары жана окуучулары терең кайгыруу менен жакындарына көңүл айтат.