Венгрия коронавирус менен күрөшүүгө Кыргызстанга гуманитардык жардам көрсөттү. Бул тууралуу Кыргызстандын Тышкы иштер министрлигинин басма сөз кызматы билдирет. Маалыматка ылайык, гуманитардык жардам көрсөтүүнүн алкагында Венгриянын тышкы иштер жана соода министри Петер Сийярто Бишкекке жумушчу сапары менен келди. 

"Бүгүн, 15-июлда кечинде Кыргызстан менен Венгриянын ТИМ башчылары Чыңгыз Айдарбеков жана П.Сийярто жолукту. Министрлердин жолугушуусу учурунда гуманитардык жардам көрсөткөндүгү үчүн Венгрия өкмөтүнө кыргыз тарабынын ыраазычылыгы билдирилди", - деп айтылат маалыматта.

Буга чейин жетишилген макулдашууларды ишке ашыруу маселелери, ошондой эле 2020-жылы президент Сооронбай Жээнбековдун Венгрияга сапарын уюштуруу жолу менен кыргыз-венгер кызматташтыгын мындан ары кеңейтүү жана тереңдетүү маселелери талкууланды.

Тараптар түрк тилдүү мамлекеттердин кызматташтык кеңешинде кызматташуунун алкагында мамилелердин өнүгүүсүнүн позитивдүү динамикасын белгилешти, атап айтканда, 2018-жылы Венгриянын Түрк кеңешинде байкоочу статусун алышы, 2019-жылы Будапешт шаарында Түрк кеңешинин өкүлчүлүгүнүн ачылышы жана бул өкүлчүлүктү кармоо боюнча венгер тарабынын каржылоого даярдыгы белгиленди.

Венгриянын Тышкы иштер министри жакынкы аралыкта Венгриянын Кыргызстандагы толук кандуу элчисин дайындоо ниетин айтты. Венгриянын Кыргызстандагы элчилигинин Европа Биримдигинин кээ бир өлкөлөрү үчүн алардын өтүнүчү менен виза маселелерин кароого даярдыгы билдирилди.

Ошондой эле венгер тарап Австрияда жашаган Кыргызстандын жарандары берип жиберген жардамды дагы алып келди.

Венгриянын тышкы иштер жана соода министри П.Сийяртонун сапарынын жыйынтыгында тараптар эки өлкөнүн Дипломатиялык академияларынын ортосунда өз ара түшүнүшүү жөнүндө Меморандумга кол коюшту.