Парламенттик шайлоонун үгүт иштери башталгандан ушул күнгө чейин шайлоонун жол-жобосун бузган 128 факты катталды. Бул тууралуу ИИМдин 15-ноябрдын саат 8:00гө карата берген маалыматында айтылат.

Анын ичинде Жазык кодекси боюнча 28 кылмыш каттоого алынган:

• 192-берене, "Шайлоочуларды сатып алуу" — 21 факты;
• 82-берене, "Жеке жашоонун кол тийбестигин бузуу" — 2;
• 200-берене, "Уурдоо" — 2;
• 355-берене, "Бийлик өкүлүн коркутуу же ага карата зомбулук" — 1;
• 145-берене, "Өмүргө жана ден соолукка кооптуу зомбулукту колдонуу жана коркутуу" — 1;
• 266-берене, "Ээнбаштык" — 1.

Жоруктар кодекси боюнча 27 факты:

• 119-берене, "Майда бейбаштык" — 1;
• 87-1-берене, "Административдик ресурсту кыянаттык менен пайдалануу" — 18;
• 94-берене, "Бөтөн мүлктү жок кылуу же зыянга учуратуу" — 6;
• 90-берене, "Орчундуу эмес өлчөмдө уурдоо" — 6;
• 66-берене, "Ден соолукка жеңил зыян келтирүү" — 1.

Ал эми ички иштер органдарынын маалыматтарды каттоо журналына ар кандай 73 материал жазылган. Анын ичинен 43ү номенклатуралык ишке чыгышталган, 15и аймактык шайлоо комиссиясына карап чыгууга жөнөтүлгөн, сегизи башка сотко чейинки өндүрүшкө бириктирилген, дагы жетөө каралууда.

"Ички иштер министрлиги саясий маселелерге катышпайт. Бардык жарандарга жана партияларга бирдей мамиле кылат, кырдаалды туруксуздаштырууга жол бербейт. Бирок укуктук тартиптин бузулушу боюнча фактылар орун ала турган болсо мыйзам чегинде чара көрөт", — деп жазылган билдирүүдө.
Мындан сырткары, ИИМ коомду тынчсыздандырууга түрткөн жалган маалымат тараткандарды аныктоо үчүн жалпыга маалымдоо каражаттарына, социалдык тармактарга жана телерадио жыштыгына мониторинг жүргүзүп жатканын эскертти.

Ошондой эле мындай иштерден алыс болууга чакырып, андай фактылар боюнча 102 телефон номери аркылуу кабарлоону суранат.