Ош облусунун Өзгөн районунун Куршаб айыл өкмөтүнүн активдүү жарандары таажы вирусу менен күрөшүүдө медицина кызматкерлерине кол кабыш кылып жатышат. Учурда 300 миң сомдон ашык каражат топтолуп, 5 ИВЛ аппаратына буюртма берилди. 

Демилгечи топтун жетекчиси Алмасбек Калбаевдин айтымында, ИВЛ аппараттар 11-12-июль күндөрү Кыргызстанга жеткирилет. Ал эми медицина кызматкерлерине коргоочу костюмдар, дары-дармек жана дагы керектүү аппараттарды сатып алуу үчүн каражат топтоо иштери уланып жатат. Бул үчүн +996556982000 ЭЛСОМ эсеби ачылды. Демилгечилер каалоочуларды көмөктөшүүгө чакырат.  

Эскерте кетсек, Куршаб айылындагы оорукананын дарыгерлери жадагалса коргоочу костюмдары жок экендигин айтып, пульсоксиметр, жасалма дем алдыруучу аппарат, дары-дармек сатып алууга жардам сурап кайрылган. 

Учурда Кыргызстанда коронавирус илештирип алгандардын жалпы саны 8 847ге жетти. Азыр стационарда 610 бейтап дарыланууда, анын бирөө реанимацияда. Үй карантининде дарыланып жаткандар 5 068 болду. Бүгүн коронавирустан дагы төрт киши каза таап, жалпы саны 116га жетти.