Бишкекте №8 автобус кырсыкка кабылып, анын кесепетинен 15 адам ооруканага жаткырылды. Бул тууралуу «Тез жардам» борборунан кабарлашты.

Жабыркагандардын 11и чоң киши, төртөө жаш балдар. Кырсык болгон жерде 7 тез жардам бригадасы иш алып барды.

Маалыматка караганда, жабыркагандардын денеси көгөргөн жана мээси чайкалган. Оор жаракат алгандар жок.

Бүгүн, 29-октябрда түшкү саат 12:00 чамасында Бишкектеги Чыңгыз Айтматов проспектисинин Киргизия-1 конушунун аймагында №8 автобустун айдоочусу рулду башкара албай бакты сүзгөн. Милициянын кайгуул кызматынан кабарлашкандай, автобустун алдынан жеңил унаа чыга калып, айдоочу андан качууга аракет кылган.

Автобус Чыңгыз Айтматов проспектиси менен өйдө бара жаткан.