Кыргызстандын аймагында көмүрдүн баасын убактылуу мамлекеттик жөнгө салуу киргизилди. Тийиштүү чечимге Министрлер кабинетинин төрагасы Улукбек Марипов кол койду.

Бул чечим көмүрдүн баасынын өсүү темпин кармап туруу, 2021-2022-жылдагы күз-кыш мезгилинен өтүүдө калкты көмүр менен өз убагында туруктуу камсыз кылуу максатында кабыл алынган.

Өлкө аймагында көмүрдүн баасын убактылуу мамлекеттик жөнгө салуу жогору бааны белгилөө менен 90 күндүк мөөнөткө киргизилди.

Экономика жана финансы министрлигине караштуу Монополияга каршы жөнгө салуу мамлекеттик агенттигине Социалдык жактан маанилүү товарларга бааларды мамлекеттик жөнгө салуу тартибине ылайык, мамлекеттик жөнгө салуу жана контролдоо боюнча чараларды көрүүсү тапшырылды.