Бүгүн, 5-октябрь Ош шаарынын күнү белгиленет. Бул тууралуу Ош шаардык мэрияснын басма сөз кызматы билдирет.

Маалыматка ылайык, шаар күнүнө карата борбордук аянтта майрамдык иш-чаралар уюштурулат.

Белгиленгендей, 10:00до Ош шаарынын өнүгүшүнө, шаардыктарга ыңгайлуу шарттарды түзүп берүү максатында, ак ниет эмгеги менен иштеп жаткан мекеме-ишканалардын, жогорку жана орто окуу жайларынын, өндүрүш ишканалардын кызматкерлеринин парады болот. Жөө жүрүш концерттик программа менен коштолот.

Кечки саат 19:00дөн баштап Орусиянын белгилүү ырчысы, «Динамит» группасынын экс-солисти Илья Зудин, Өзбекстандын ырчы айымы Севинч Муминова, Кыргызстандын белгилүү эстрада жылдыздары Бактияр Токторов, Гүлжигит Сатыбеков, Нурлан Насип жана Ош шаарынын маданият башкармалыгынын чыгармачыл топторунун катышуусунда чоң программадагы гала-концерт болот.