Министрлер кабинетинин төрагасы Улукбек Марипов Соода-экономикалык кызматташтык боюнча кыргыз-түрк өкмөттөр аралык комиссиясынын X кеңешмесине катышуу үчүн келген Түркиянын вице-президенти Фуат Октай менен жолугушту.

Ал Түркия Кыргызстандын бирден-бир ири соода-экономикалык өнөктөшү экенин айтты. Быйыл эки өлкөнүн дипломатиялык мамилесине 30 жыл толот.

«Кыргызстан менен Түркия стратегиялык өнөктөш, бизди тилибиз, динибиз, бир туугандык жана достук мамилелерге негизделген байыркы тарыхый-маданий байланыштарыбыз бириктирип турат», — деди Улукбек Марипов.

Ал эки өлкөнүн ортосундагы товар жүгүртүү деңгээлин 1 млрд долларга жеткирүү керектигин айтып, орто жана чакан долбоорлорду ишке ашыруу үчүн инвестициялык фонд түзүүнү сунуштады.

Мындан тышкары социалдык-гуманитардык тармактагы кызматташтык да  өнүгүп жатканын белгилеп, жакын арада келе турган 150 миң доза вакцина үчүн ыраазычылык билдирди.

Түркиянын вице-президенти Фуат Октай Түркия Кыргызстанга инвестиция тартууга даяр экенин айтты.

Жолугушууда медициналык багыттагы түрк университеттеринде кыргыз студенттерин окутууга квоталардын бөлүнүшү, Түркиянын ооруканаларында акысыз негизде 150 кыргызстандыкты дарылоо үчүн ар жылкы квоталарды берүүнү жаңыртуу, эки өлкө жарандарынын республикалардын аймагында жүрүү мөөнөтүн узартуу, иштөөгө уруксат берүүчү документтердин наркын төмөндөтүү маселелери да талкууланды.

Булак: Марал