Коомчулукту өнүктүрүү жана инвестициялоо агенттиги (АРИС) ишке ашырып жаткан «Айылдарды туруктуу өнүктүрүү» долбоорунун алкагында Чүй облусунун Новомихайловка айылында башталгыч класстар үчүн 100 орундуу жаңы мектеп ачылды.

Жалпы аянты 828,6 чарчы метрди түзгөн мектепте 5 окуу классы, дарыгердин бөлмөсү, китепкана, китептер үчүн архив, ашкана, компьютердик класс, санитардык түйүн, кампа жана техникалык бөлмөлөр бар.

Курулушка 26 млн 145,4 миң сом сарпталган. Анын ичинен 25 млн 822,6 миң сомду АРИС грант катары берген. Андан тышкары Чым-Коргон айыл аймагынын тургундары 322,7 миң сом чогулткан.

Новомихайловка айылынын тургундары жаңы мектепке абдан муктаж болуп келген. Буга чейинки 7 жылдык эски мектеп 1950-жылы пайдубалы жок, чийки кирпичтен салынган. Андан бери бир да ирет оңдоп-түзөөдөн өткөн эмес. Ага байланыштуу «Айылдарды туруктуу өнүктүрүү» долбоорунун алкагында башталгыч класстарга мектеп салып берүү каралган.

Белгилей кетсек, «Айылдарды туруктуу өнүктүрүү» долбоору Министрлер кабинети, Ислам өнүктүрүү банкы жана Ислам Өнүктүрүү үчүн тилектештик фонду тарабынан каржыланат.

«Айылдарды туруктуу өнүктүрүү» долбоору 2017-жылдан бери Чүй облусунун Кемин, Жайыл жана Панфилов райондорунда ишке ашырылып келет. Бюджети 11 млн долларды түзгөн бул долбоор жакырчылыкты жоюу жана аялдардын социалдык-экономикалык абалын жакшыртууну максат кылат. Иштөө мөөнөтү ушул жылдын декабрь айында аяктайт.

Булак: Марал