Ысык-Көлдө президент Садыр Жапаровдун колдоосу менен “Манастын уулу Семетей” тасмасы тартылууда. Бул тууралуу аталган тасманын продюсери жана сценаристи Өмүрзак Төлөбеков билдирди.

Анын айтымында, кинону тартуу 22-июлда Чуңкурчак жайлоосунда башталды. Учурда ал жерге Манастын хан ордосу тургузулуп, бир эпизод тартылууда.

“Тасма “Семетей” эпосунун жана Жалил Садыковдун “Манастын уулу Семетей” пьесасынын негизинде тартылып жатат. Ошондой эле дагы башка прозаларды карап чыгып, мен сценарий жазгам. Кино жаратуу үчүн үч жылдан бери даярдык көргөнбүз. Ортодо пандемия да болуп калып, мына эми ишке киришип жатабыз. Белгилей кетсек, биринчи, кинотеатрлар үчүн 2,5-3 сааттык көркөм фильм болот. Кытай, Токио, Казакстан, Өзбекстан, Россия, Индия сыяктуу өлкөлөр менен сүйлөшүп жатабыз. Буйруса, ошол жакка дагы алып чыгабыз. Учурда биз убактысын кенен кылып, 4 сааттай кылып тартуудабыз. Анткени кинотеатрларда көрсөтүлүп жатканда кошумча эпизоддорду кошуп, 10 серия кылып чыгарабыз", - дейт ал.

Төлөбеков “Манастын уулу Семетей” тасмасы президент Садыр Жапаровдун колдоосу менен тартылып жатканын айтып, чет өлкөлүк өнөктөштөр да жардам берүүнү каалап жатканын белгиледи.

“Кинонун азыркы таптагы бюджети 1 млн долларду түзөт. Ал эми каармандар тууралуу айта кетсем, Каныкейдин ролун Альбина Имашова, Чыйырдыны Калича Сейдалиева, Бакай атаны Темирлан Сманбеков, Жакыпты Эшенкул Барпиев аткарат. Негизги каарманыбыз Семетейдин ролун бүгүн чечебиз. Кастинг өтүп, азыр үч бала каралууда. Ага чейин Семетейдин кичинекей кезиндеги эпизоддору тартылат”, - деп маалымдады кинонун продюсери.

“Манастын уулу Семетей” тасмасынын режиссеру Дархан Кожохан, Эгемберди Бекболиев, продюсери жана сценаристи Өмүрзак Төлөбеков, башкы оператору Айбек Жангазиев, креативдүү продюсери Нурлан Мамакеев, аткаруучу продюсери Жолдошбек Жанжигит жана койгон сүрөтчүсү Садыр Сагынбаев.