Кыргызстандык спортчулар жана делегациянын мүчөлөрү 23-июлда Жапониянын Токио шаарында XXXII Жайкы Олимп оюндарынын ачылышына катышты. Өлкөнүн желегин ок атуу спортунун чебери Каныкей Кубанычбекова менен суучул Денис Петрашов көтөрүп чыкты.

Олимпиаданын уюштуруучулары гендердик теңчиликке байланыштуу тууну аял менен эркек көтөрүп чыксын деген эрежени киргизген. Бирок айрым мамлекеттердин желегин бир эле киши көтөргөн учурлар да болду.

Олимп оюндарынын ачылышы 68 миңге ылайыкташкан стадиондо болду. Бирок ага болгону 950 адам гана кирди, дүйнөлүк лидерлерден он бештей гана конок катышты.

Жайкы Олимп оюндарынын алкагында кыргызстандык спортчулар 24-июлдан тарта мелдештерге чыга баштайт. Биринчилерден болуп Каныкей Кубанычбекова 24-июлда Бишкек убактысы боюнча саат 5:30 ок атуу боюнча мелдешке катышты. Анын жыйынтыгында Кыргызстандык спортчу Каныкей Кубанычбекова Олимпиада оюндарында 10 метр аралыктан ок атуу спорту боюнча 48-орунга илинди. Бул тууралуу Олимпиада оюндарынын сайтында айтылат.

Ал 24-июлда 50 спортчунун ичинен 612,8 упайы менен 48-орунга жайгашты. Финалга өтүш үчүн спортчулар 628,5 упай топтоо керек эле.

Белгилей кетсек, Олимпиада оюндарына Кыргызстандын атынан 16 спортчу катышууда.

Кыргызстандан 16 спортчу Токиодогу оюндарга катышууда. Алардын ичинен эркин күрөштөн беш, грек-рим күрөш боюнча төрт, жеңил атлетикадан эки, оор атлетикадан, сууда сүзүү, ок атуу, фехтование жана дзюдодон бирден спортчу Олимпиадага жолдомо алышкан.

Олимпиада оюндарына лицензия алган спортчулар:

Айсулуу Тыныбекова, Айпери Медет кызы, Мээрим Жуманазарова, Атабек Азисбеков, Жоламан Шаршенбеков, Акжол Махмудов, Үзүр Жузупбеков, Эрназар Акматалиев, Владимир Золоев, Дарья Маслова, Нурсултан Кеңешбеков, Роман Петров, Бакдөөлөт Расулбеков, Каныкей Кубанычбекова, Айаал Лазарев жана Денис Петрашов. (BTo)