“Адамдардын бири-бири менен байланышын токтотуу же социалдык аралыкты сактоо жакын арада коронавирустун жайылышын токтотот”, - дейт Нобель сыйлыгынын лауреаты, биофизик Майкл Левитт. Ал Los Angeles Times басылмасына интервью берди.

Серепчинин баамында, жакын арада АКШда Кытай сыяктуу эле кырдаал жеңилдешет.

“Негизгиси, дүрбөлөңгө түшпөшүбүз керек, калганы жакшы болот”, - дейт окумуштуу.  

Левитт мырза февраль айынын башында эле коронавирус илдетинин жайылышы алгач Кытайда токтошун айткан.

Биофизик 78 мамлекеттеги кырдаалды изилдеген. Анын айтымында, жаңы жуктуруп алгандардын санынын азайышы пандемиянын жолун торойт.

Мисалы, Түштүк Кореяда коронавирусту жаңы жуктуруп алгандардын саны азайып жатат, демек ооруунун темпи басаңдады. Иранда да кырдаал кыйла жеңилдеди. Ал эми Италияда пандемия жогорку чекитине жетти.

Серепчинин айтымында, Кытайда март айынын акырында коронавирус толугу менен токтойт.

Бир катар окумуштуулар коронавирус пандемиясы бир жылга чейин уланышы мүмкүндүгүн болжоодо. Ал эми Левитт мырза бул илдеттин жайылышы жакын арада токтошун айтат.