Улуттук коопсуздук мамлекеттик комитеттин төрагасы Камчыбек Ташиев соңку күндөрдө орун алган окуялар боюнча суроолорго жооп берди. Ага Орхан Инандынын уурдалышы боюнча бир нече суроолор берилди.

"Сиз жогоруда айтып өттүңүз. Орхан Инандыга коопсуздугу боюнча эскертүү берилген, ошол учурда ал башка мамлекетке көчүп кетсе болмок дедиңиз. Анда Кыргыз өлкөсүндө коопсуздук туулган жарандардын баары көчүп кете бериши керекпи?", - деген суроо берилип, Ташиев ага төмөнкүдөй жооп берди.

"Урматтуу журналисттер, силер Орхан Инандыны кыргыздын жараны менен салыштырбагыла. Ал башка элде жасаган кылмыштары үчүн жооп берип жатат. Ал башка мамлекетте террордук кылмыш кылып, анан биздин мамлекетке келип отуруп калган. Ал Кыргыздын жарандыгын алганы боюнча кылмыш иши ачылган, ал биздин жарандыкты алгандан кийин Түркиянын жарандыгын тапшырышы керек эле, аны тапшырган эмес, Түркиянын паспортун пайдаланып жүргөн да. Кыргызда мындайды "сыртынан жалтырак, ичинен калтырак" деп коёт. Сыртынан Кыргыздын жаранымын деп жүргөн дагы, ичинен Түркияда абал өзгөрүп кетсе, кайра ошол жакка кетип калам деген ой менен жүргөн", - деди Ташиев.

Ошондой эле Ташиев Кыргыз өлкөсүндө туулган адам болсо, ошондой эле башка жактын жарандыгы жок Кыргыз жаранына ушул сыяктуу кооптуу абал жаралса, тиешелүү бардык аракеттер көрүлө турганын кошумчалады.