Бүгүн, 2-июлда Баткен шаарында медицина кызматкерлери кесиптик майрамын салтанаттуу белгилеп жатат. Бул тууралуу министрлер кабинетинин Баткен облусундагы өкүлчүлүгүнүн басма сөз кызматы билдирет.

Маалыматка ылайык, салтанатта жалпы Баткен облусунун район, шаарларынан медицина кызматкерлери келишкен.

Кесиптик майрамдын салтанаттуу ачылышына министрлер кабинетинин Баткен облусундагы ыйгарым укуктуу өкүлү Абдикарим Алимбаев баштаган облустук жана район, шаардык мекеме-ишканалардын жетекчилери катышып, ак халатчандарды куттукташты.

“Эзелтен дарыгердин кесиби гумандуу кесиптердин бири болуп келген. Ал зор күч-кубатты, сабырдуулукту, терең билимди жана мээрмандыкты талап кылат. Адамдын өмүрүнөн жана ден соолугунан кымбат эч нерсе жок. Сиздер адамдын баа жеткис өмүрүн жана ден соолугун коргоп, сактап келесиздер. Айрыкча Баткен облусунда эмгектенип жаткан ар бир медицина кызматкери патриот жана өз кесибинин мыктылары. Өз жанын аябастан 28-30-апрель күндөрү мекен үчүн тик туруп кызмат өтөдүңүздөр. Бул чоң эрдик экенин айтпаса да ар бир Баткен облусунун тургундарынын жүрөгүндө сакталат", - деди облус башчысы өз сөзүндө дарыгерлерди кесиптик майрамы менен куттуктап жатып.

Мындан сырткары облус башчысы А.Алимбаев биргеликте аракет жасап, медицина тармагында гана эмес жалпы облустун социалдык жана экономикалык абалын алдыга жылдырууга умтулуу, өнүктүрүүнү баса белгиледи.

Салтанаттын жүрүшүндө медицина тармагын өнүктүрүүдө жана элге ак кызмат кылууда өзүнүн зор салымын кошуп келе жаткан ак халатчандарды облус башчысы ардак грамотасы менен сыйлады.

Бүгүнкү медицина кызматкерлеринин салтанаттуу майрамын утурлай концерттик программа да уюштурулуп, кызуу өтүүдө.