2020-жылдын 8-майында Баткен районунун Чек аймагы менен Тажикстандын Кумазор айылынын тургундарынын ортосунда чыр чыккан. Такталбаган жер талаштан чыккан чууда эки өлкөнүн жарандары таш ыргытып, атыш да болгон. Чатакта чек арада жайгашкан Мажитовдордун үйү күйүп кеткен. Бул окуядан кийин тажик тарап үйдүн ээси Эсен Мажитовго кылмыш ишин козгоп, издөө жарыялаган. Ал Орусияда иштеп жүргөн жеринен кармалып, учурда 40 күнгө камалганын анын үй-бүлөсү билдирди. 

Маалыматка караганда, Эсен Мажитов өзүнүн жерине эгин эккени үчүн жоопко тартылууда. Бул үй-бүлө мурдатан айдап келген жерди тажик тарап талаштуу аймак деп атаган.