2024-жылдын 9-мартында Польшанын борбор шаары Варшавада Кыргыз Республикасынын аялдарынын биринчи европалык форуму өттү. Анда Европадагы кыргызстандык айымдардын өлкөгө кошкон салымы, миграция маселеси талкууланууда. Ага Европанын бир катар аймагынан жана Кыргызстандан келген айымдар катышууда.

Форумда Кыргызстандын Германиядагы элчиси сөз сүйлөп, Европа өлкөлөрүндө окуп, иштеп, тажрыйба ашырып жаткан кыргызстандык кыз-келиндердин интеграциясындагы ийгиликтерди белгиледи:

“Силердин бул жерге келип иштеп, окуп, тажрыйба топтоп жүргөнүңөр биздин тарыхыбыздын бир чоң этабы. Европага келип, ат салышып, жергиликтүүлөр менен тизгин талашып, бизнес ачып иштеп жүргөн кыздарыбызды көрүп жатабыз. Сиздерге колдон келген жардамды бергенге даярбыз”, - деди элчи.

Форумга "Биздин айымдар" коомдук кыймылынын президенти, Бишкек шаарынын экс-вице-мэри, Норвегия падышачылыгынын ардактуу консулу, КР Соода-өнөр жай палатасынын аялдар комитетинин жетекчиси, "Эко Деми" коомдук фондунун негиздөөчүсү жана Дүйнөлүк тазалык күнүнүн элчиси Айжан Чыныбаева да катышып, миграциянын оң жана терс жактары жөнүндө сүйлөдү. 

Элчи Өмүрбек Текебаев Германиянын бир шаарына "Кыргыз кызы" деп аталган айкел орнотуларын билдирди. Айкелди белгилүү кыргызстандык скульптор Тамила Маматова жасап жатат.