Бексултан Алимбеков эл аралык музыкалык онлайн сынакта биринчи орунду багындырды. Аталган онлайн музыкалык жарыш вокал багыты боюнча түрк тилдүү өлкөлөрдүн таланттары ортосунда болгон. Бул тууралуу ырчы, Бексултан Алимбеков KEREEZ.KGге билдирди. 

Төмөндө Бексултан Алимбековдун билдирүүсүн өзгөртүүсүз беребиз:

"Сиздер менен жакшы бир жаңылыгым менен бөлүшөйүн дедим.

“THE CALL OF WINTER” аттуу эл аралык онлайн фестивалда 1-орунду алганым мен үчүн күтүлбөгөн, чоң жеңиш болду.

2021-жылдын 13-январынан баштап бул сынакка киришип баштадым. Эл аралык сынакка көптөгөн өлкөлөр катышты. Казакстан, Алтай, Румыния, Түркия, Македония өңдүү мамлекеттерден түзүлгөн калыстар тобунун жыйынтыгы менен “THE CALL OF WİNTER” сынагында 1-орунга ээ болдум.

Сынак үчүн Түркиянын белгилүү композитору, пианист Ферди Өзбейендин репертуарынан “Курумуш бир дал гибийим” (Куруган бир тал сыяктуумун) аттуу чыгарманы Түрк улуттук аспабы, саздын коштоосунда ырдадым. Сынакта калыс баасын берген эл аралык калыстар тобуна, пандемия учуруна карабастан маданий иш-аракеттерин көрүп жаткан “Тагдыр.Мезгил. Жашоо" (“ТМЖ”Коомдук фонду) жетекчиси Мира Токтогоновага жана Анкара маданий клубунун башчысы Метин Өзасланга жана Мурзакматова Диляра Тургуновнага терең ыраазычылыгымды билдирем! Мага жардам берип кеңешин аябаган музыкант досум Аңыл Байкалга да рахматымды айтам.

Мындай эл аралык деңгээлдеги жеңиш мага дагы да чоң мотивациясын берди. Бул мотивация элим үчүн ырдай берүүмө түгөнгүс күч десем болот".

Биз дагы Бексултандын жеңиши менен куттуктап, ага албан ийгиликтерди каалайбыз!