Режиссер Руслан Акун тарткан “Салам, Европа” тасмасы Кыргызстандын бардык кинотеатрларында көрсөтүлүп баштады. Фильмдин премьерасы Бишкекте 14-ноябрда, Ошто 15-ноябрда, ал эми Алматада октябрь айында ийгиликтүү өттү. Тасма көрүүчүлөрдүн жылуу пикирине, мактоосуна татыды.

Башкы ролдорду КРдин эл артисти, дүйнөлүк масштабдагы актриса Айтурган Темирова менен Казакстандын эмгек сиңирген артисти Бауржан Каптагай ойногон. Легендарлуу кыргыз актрисасы киного тартылуу үчүн атайын Чехиядан Кыргызстанга келген. 

Фильм комедия жанрында. Бул Европада жашаган небересине автостоп менен барган чоң эне менен чоң ата жөнүндөгү тасма. Алар жолдо көп окуяларга туш болушат. Күлкүлүү окуялар ортосунда чоң эне менен чоң атанын небересине берген таалим-тарбиясы баяндалат.

Фильмдин режиссеру Руслан Акун "Салам, Нью-Йорк", "Апамды издеп", "Бишкек, мен сени сүйөм" жана башка тасмаларын тарткан.