5-июлда Ала-Арча көрүстөнүндө белгилүү кинорежиссер, СССРдин жана Кыргызстандын эл артисти, СССРдин Мамлекеттик сыйлыгынын лауреаты Болотбек Төлөнович Шамшиевдин эстелигин ачуу аземи болот.

Болотбек Шамшиевдин ысымы дүйнөнүн көп өлкөлөрүндө белгилүү. Анын чыгармачылыгы 60-жылдардагы «кыргыз керемети» феномени менен ажырагыс. Ошол мезгилде кыргыздын жаш кинорежиссерлорунун чыгармачылыгы бүткүл союздук жана эл аралык кинофестивалдардын бийиктиктерин багындырган.

Болотбеков Шамшиев «Манасчы» жана «Койчу» даректүү тасмаларынын, «Караш-Караш окуясы», «Ысык-Көлдүн кызгалдактары», «Бөрү зындан», «Снайперлер» көркөм тасмаларынын режиссеру. Болотбек Төлөновичтин чыгармачылыгында Чыңгыз Айтматовдун чыгармаларынын негизинде тартылган “Ак пароход”, “Эрте келген турналар”, “Фудзиямадагы кадыр түн” тасмалары өзгөчө орунду ээлейт. Анын тасмалары ар кандай эл аралык, ата мекендик кинофестивалдарда мамлекеттик сыйлыктарга татыктуу болгон.

Эстелик “Кыргыз керемети” деп аталып, кинорежиссердун уулу Чыңгыз Шамшиевдин демилгеси менен тургузулду. Идеяны кыргызстандык скульптор Тамила Маматова жана Багдад Калчаев жетектеген усталар ишке ашырышкан. Анда Болотбек Шамшиевдин 40 жашындагы элеси тартылган. Бул кыргыздар үчүн турмуштун маанилүү мезгили, ой токтотуп, жыйынтык чыгарып, өз жашоосун кайра карап, жаңы пландарды куруунун доору. Агайдын колунда улуу “Манас” эпосунун алгачкы басылмаларынын бири – кыргыз элинин акылмандык жана руханий казынасы турат.

Салтанатта кинорежиссердун үй-бүлөсүнө Кыргыз Республикасынын жогорку сыйлыгы болгон «Ак шумкар» ордени да тапшырылат. Дээрлик бир жыл мурун, 2022-жылдын 1-сентябрында Кыргыз Республикасынын Президентинин 2022-жылдын 1-сентябрындагы Жарлыгы менен кыргыз элинин маданиятына кошкон зор чыгармачылык жетишкендиктери жана баа жеткис салымы үчүн Болотбек Шамшиевге көзү өткөндөн кийин Ак Шумкар” өзгөчө белгиси менен “Кыргызстандын баатыры” эң жогорку артыкчылык даражасы ыйгарылган.

Орду: Ала-Арча көрүстөнү

Датасы: 2023-жылдын 5-июлу

Башталышы: 10:00