КР ИИМдин ЖКККББнын Жол көзөмөлдөө бөлүмүнүн демилгеси менен борбор шаарыбыздагы жол тыгындарын жоюу, жолдун түзүмүн, жол чырактардын иштөө шарттарын жаңылоо жана жол кыймылынын катышуучуларына ыңгайлуу шарттарды түзүү боюнча Бишкек шаарынын мэриясына караштуу Транспорт жана жол-транспорттук инфратүзүмдү өнүктүрүү департаменти, «Бишкекасфальтсервис» муниципалдык ишканасынын, райондук муниципалдык администрациялардын өкүлдөрү жана башка кызматтардын катышуусунда ыкчам кеңешме өткөрүлдү.

Кеңешменин жүрүшүндө ЖКККББнын Жол көзөмөлдөө бөлүмүнүн башчысы милициянын подполковниги Тынычбек Саидов бүгүнкү күндө борбор шаарыбызда унаалардын көптүгү, оңдоп-түзөө жумуштары жүргүзүлүп жаткан жол тилкелеринде жана жол чырактар өчүп же иштебей калган учурларда тезинен оңдоо иштеринин кечиктирилип жаткандыгы жол тыгындарынын пайда болуусуна себеп болуп жаткандыгын белгилеп, бул багытта тиешелүү иш-чараларды иштеп чыгуу демилгесин көтөрдү.

Ошондой эле ЖКККББгы тарабынан жөнөтүлгөн сунуш каттарды карап чыгуу менен аларды өз убагында аткарууну колго алып, жарандардын кайрылууларын ыкчам чечүү максатында бирдиктүү байланыш каражатын түзүү боюнча чечим кабыл алынды.