Эртең, 16-май күнү Бишкек шаарынын пилоттук мектептеринде таштандыны иргөө боюнча өткөн сынактын жеңүүчүлөрүн сыйлоо аземи болот. Иш-чара “Жер Эне” долбоорунун алкагында уюштурулган. “Жер Эне” долбоорунун максаты - таштанды полигондоруна төгүлгөн катуу калдыктардын көлөмүн минималдаштыруу.

Долбоордун алкагында мектеп окуучулары үчүн тренингдер иштелип, ал: 1-4-класстар, 5-6-класстар, 7-8-класстар, 9-11-класстарга эки тилде (кыргызча жана орусча) окутулду. Бул багытта Билим берүү жана илим министрлиги менен кызматташуу жөнүндө меморандумга кол коюлду. 

Бишкектеги 8 пилоттук мектепте (№18, №65, №71, №43, №88, №83, №55, №59 мектептер) 1-11-класстын окуучулары арасында таштандыны иргөө боюнча окуулар өттү. Окууга катышкандардын саны 14 миңден ашты. 

Окуу бүткөндөн кийин аталган мектептерде таштандыны өзүнчө иргеп топтоо үчүн жашыктар: пластмасса, айнек жана алюминий калдыктары үчүн металл контейнерлер; пайдаланылган аккумуляторлорду чогултууга кутулар жана макулатурага эко-бокстар коюлду. Ошондой эле пайдалуу маалыматтар жатык түшүндүрүлгөн плакаттар илинди. 

Мектептерде чогулган катуу таштанды 15-майда таразага тартылды. Жыйынтыгында 1,5-2 миңдей окуучусу бар мектептер көп топтогону аныкталды. Чогулган таштанды кайра иштетилет.

Жеңүүчүлөргө сыйлыктар 16-май күнү саат 12:00дө төмөнкү даректерде тапшырылат:

12:00 - Бишкек шаарындагы №88 орто мектеби - Санжыра көчөсү, 1. 

Аталган мектеп 2 миңден ашык окуучусу бар мектептердин ичинен алдыга чыккан. 

14:00 - Бишкек шаарындагы №59 орто мектеби - Лущихина көчөсү, 35. 

Аталган мектеп 1,5 миңге чейин сандагы окуучусу бар мектептердин арасында биринчи орунду ээледи.