15-октябрда Карагач сейил багына көчөт отургузулду. Иш-чара БААУдагы “Жашыл айлыктын” жана “Экопарк “Карагач багы” долбоорун ишке ашыруунун алкагында Франция-Кыргыз экотуризм ассоциациясы (AFKE) менен биргеликте БААУнун Жарандык активдүүлүк борбору тарабынан уюштурулду.

“Экопарк “Карагач багы” долбоору ишке ашырылып жаткан беш жылдын ичинде бир топ иштер аткарылды. Бул тууралуу Чыңгыз Шамшиев журналисттерге берген маегинде билдирди:

«Паркты калыбына келтирүү иштери биз күткөндөн да жакшы жыйынтыктарды берди. Пландалгандан да эрте бүтүрүүгө жетиштик. Буга жаштардын активдүүлүгү түрткү болду. Сейил бактан жүздөгөн тонна таштанды чыгардык.

Паркты коргоого алгандан кийин дарактардын бутактарын мыйзамсыз кыюу, мыйзамсыз курулуш куруу жана мал жаюу токтоду. Табият мынчалык кыска аралыкта өзүн-өзү калыбына келтирип алышына бир чети таң калдым. Кычкылтектин компьютерде түзүлө турган кандайдыр бир код же алгоритм эмес, өтө татаал химиялык жана биологиялык процесстердин натыйжасында пайда болушун балдарга түшүндүрүү кажет. Бул сейил бакта жаштар муну бат эле түшүнүп алышына ишенем.

“Карагач сейил багы” экопаркы долбоору түзүлгөн беш жылдын ичинде бул жерге 3500 миңден ашуун бак-дарак отургузган миңдеген студенттер жана мектеп окуучуларына абдан ыраазымын. Бул сейил бакка бак-дарак тиккен улан-кыздардын баары “Карагач сейил багын” сактап калууга салым кошушту”.