Ийгиликтүү жеке ишкер, бизнес башкаруучу, Smart Invest жана Bellagio Group'тун өнөктөшү, маркетинг боюнча адис Айбек Жангазиевдин дебюттук бизнес-тренинги ийгиликтүү өттү. Ишкердин насаатын укканы 100гө жакын киши келди. 

Дебюттук бизнес-тренинг "Өз бизнесиңди өнүктүр!" деген аталышта болду. Айбек Жангазиев алгач жеке тажрыйбасы менен бөлүшүп, ишкерликтин күнгөй-тескейи тууралуу кеп кылды. 

"Бизнесте бир калыпта иштөө деген түшүнүк жок. Сен же көтөрүлөсүң, же төмөндөйсүң. Эсиңиздерде болсун, бизнесте так эрежелер жок. Жалпы бир система болушу мүмкүн, бирок бул ишкерлик күтүлбөгөн сюрприздерге бай болот. Ошондуктан, бизнес адамдын көрөгөчтүгүн талап кылат", - дейт Жангазиев. 

Андан соң, ишкерликтеги эскирген жана жаңы багыттар жөнүндө айтып берди. Бизнес-тренингдин катышуучулары менен бир катар татаал суроолорго жооп издешти. Келгендер да активдүү катышып, баары жакшы идеяларды алганын билдиришти. 

Эскерте кетсек, Айбек Жангазиев Кыргызстандагы ийгиликтүү ишкерлердин бири. Ал кийим-кече сатуу, хорека тармактарында аттын кашкасындай таанымал.