Бишкекте Аялдар ишкердигинин бүткүл дүйнөлүк күнүнө карата эл аралык конференция өттү. Иш-чара быйыл бешинчи ирет өтүп жатат.

Конференцияга премьер-министр Мухаммедкалый Абылгазиев, экс-президент Роза Отунбаева, БААУнун вице-президенти Чыңгыз Шамшиев, Өзбекстан, Казакстан, Тажистан мамлекеттеринин жана жергиликтүү ишкер айымдар катышты.

Өкмөт башчы ишкер айымдарды майрамы менен куттуктап, алардын өлкөнү жана жергиликтүү коомчулуктарды социалдык-экономикалык өнүктүрүүгө кошкон салымын белгилеп өттү. Абылгазиев өлкөдө экономиканын басымдуу бөлүгүнө салым кошкон аялдардын саны жылдан жылга көбөйүп жатканын кошумчалады.

Ал эми БААУнун вице-президенти Чыңгыз Шамшиев билим берүүнү айымдарсыз элестетүү мүмкүн эместигин айтат.  Учурда Кыргызстанда жеке мектептер, бала бакчалардын ачылышында аялдар чоң роль ойноп, билим берүүнүн сапатын жакшыртууда ишкер айымдардын ролу эбегейсиз, - деди Шамшиев. Андан сырткары, эл аралык жана жергиликтүү билим сынактарында, Жалпы республикалык тестирлөөдө кыздар эң жакшы жыйынтыктарга жетишип жатканын билдирди.

Бүгүнкү күнү республикада айымдар үзүрлүү иштеген бир нече кластер динамикалуу өнүгүп жатат. Алсак, тигүү тармагында иштеген айымдар 90% түзүшөт. Тейлөө тармагында 402 ишкана бар болсо, анын 40%дан ашыгы аялдардын ишканалары. Билим берүү тармагында: өлкө боюнча 74 миң мугалим болсо, анын 69 миңин дээрлик 90%ын аялдар түзөт. 2018-жылы 1095 ишкана болсо, анын 701 же 70% аялдарга таандык. Айыл чарбасында  5 миңден ашык чарбалык ишканалар болсо, анын 40%ын аялдар ачкан ишканалар.

Эскерте кетсек, өлкөдө экономикалык активдүү калктын 68%ын аялдар түзөт.