Жалпы республикалык тестирлөөнүн жыйынтыгында 200дөн ашуун упай чогултуп, Алтын сертификатка ээ болгон жана БААУну тандаган кезектеги каарман жөнүндө маалымат бермекчибиз.

БААУ – ЖРТнын жыйынтыгында өлкөбүздүн мыкты окуучуларына 4 жыл бою акысыз билим алуу мүмкүнчүлүгүн берген университет. Ошондуктан тестирлөөдөн жогорку упай алып, Алтын сертификатка ээ болгон мектеп бүтүрүүчүлөрү бизде толугу менен бекер окушат! Болгону абитуриенттерден биздин кирүү сынактарды ийгиликтүү тапшыруусу талап кылынат: англис тили менен математикадан тест жана эссе. Анткени бизде окутуу англис тилинде жүргүзүлөт.

Пягай Наён Бишкектеги №12 мектеп-гимназиянын бүтүрүүчүсү. Жалпы республикалык тестирлөөдөн 226 упай чогултуп, Алтын сертификат алган. Наён биздин кирүү сынактарды тапшырып, психология факультетине окууга кабыл алынды. Бизге берген маегинде ал факультетти тандоо оңой болбогонун билдирди:

“Мен ЖРТга январда даярданып баштадым. Курска жазылып, ал жакта мени тестке жакшы даярдашты. Ошондой эле карантин учурунда өз алдымча даярданууга убакыт кенен болду: ар кандай темалар боюнча кемчиликтерди толуктоого, сынап көрүү тесттерин тапшырууга.

Башка абитуриенттер сыяктуу эле мен да узак убакыт адистикти тандай албай кыйналдым.

Мен БААУну кезинде бул окуу жайды аяктап, учурда ийгиликтүү компанияларда иштеп жаткан туугандарым жана тааныштарымдын сунушунун негизинде тандадым. Жакшы билим берүүдөн тышкары БААУ өз студенттери үчүн көптөгөн мүмкүнчүлүктөрдү түзүп берет: алмашуу программасы, кошумча адистикти өздөштүрүү жана башкалар.

Абитуриенттерге өз кызыкчылыктары менен мүмкүнчүлүктөрүнүн негизинде терең таразаланган жана ойлонулган чечим кабыл алуу кеңешин берем...”