Тынчтык үчүн Нобель сыйлыгы Эфиопиянын премьер-министри Абий Ахмедке “Эритрея менен чек арадагы келишпестиктерди чечүү демилгеси” үчүн ыйгарылды. Бул тууралуу Норвегия Нобель комитетинин төрайымы Берит Райсс-Андерсен билдирди.

“Норвегиялык Нобель комитети, Абий Ахмеддин Эритрея менен чек арадагы келишпестиктерди тынчтык жолу менен чечүү аракети жана эл аралык кызматташууга үндөгөн демилгелерин татыктуу деп тапты”, - деди Райсс-Андерсен.

Абий Ахмед 2018-жылы Эфиопиянын Премьер-министри болуп шайланган. Ал кызматка келер замат Эритрея менен мамилени жакшыртуу демилгесин көтөргөн.

Комитет билдиргендей, Абий Ахмед Эфиопиянын калкына үмүт тартуулап, келечекке болгон ишенимин бекемдөөдө.

Абий Ахмед алгачкы 100 күндүн ичинде өлкөдө жарыяланган өзгөчө кырдаалды жокко чыгарып, саясий куугунтукка кабылган миңдеген кишиге амнистия жарыялап, бошоткон. Андан сырткары, ЖМКдагы цензураны жоюп, мыйзамсыз оппозициялык топторду мыйзамдаштырып, коррупционер аскер жана жарандык лидерлерди кызматтан кетирип, мамлекеттин саясий, коомдук жашоосунда аялдардын ролун күчөткөн.

Тынчтык үчүн Нобель сыйлыгы 99 жолу ыйгарылып, 133 лауреаты бар. Татыктуу талапкер жок болгонуна байланыштуу 1972-жылдан бери берилбей келген.

Сыйлыктын акчалай бөлүгү 9 млн крон, доллар менен 909 миңди түзөт. Лауреаттар адатта акчаны кайрымдуулук иштерине бөлүп беришет.

Сыйлык тапшыруу аземи 10-декабрь күнү Осло шаарында өтөт.