2019-жылдын 30-декабрь күнү Президент Сооронбай Жээнбеков “Кыргыз Республикасынын мамлекеттик сыйлыктарын ыйгаруу жөнүндөгү” Жарлыгына кол койду. Ага ылайык, Борбордук Азиядагы Америка университетинин антропология факультетинин профессору Чолпон Турдалиевага “Кыргыз Республикасынын илимине эмгек сиңирген ишмер” наамы ыйгарылды.

Жарлыкта көрсөтүлгөндөй, сыйлыктар Кыргызстандын социалдык-экономикалык, интеллектуалдык жана маданий дараметин көтөрүүгө кошкон салымы үчүн берилди.

Чолпон Турдалиева БААУда 2006-жылдан бери эмгектенип, 2016-2019-жылдарда Германиядагы Гумбольта университетинде докторант (PhD Candidate) кызматында иштеген. Турдалиева үч монография, үч окуу пособиясы жана элүүдөн ашык илимий макаланын автору. Ошондой эле, жети аспиранттын жетекчиси болуп, алардын үчөө 2014-2015-жылдарда кандидаттык диссертацияларын коргоп, тарых илиминин кандидаты наамына ээ болушкан.

Чолпон Турдалиеванын изилдөө долбоорлору: “Жалал-Абаддын биомаданий ар түрдүүлүгүн сактоочу музей” (Кристенсен фондунун долбоору, май 2017 – май 2018); «Central Asian Diaspora in the USA: The case of Kyrgyz Americans» (AUCA-Columbia University Project, 2017); «Dungan Marriage and Family in a Changing Kyrgyzstan: the case of Dungans in Birdik and Luxembourg villages» (AUCA-Indiana University Project, 2018).